އެކުވެރި ގައުމުތަކުގެ އިސްވެރިންނަށް ކުޑައިމީސްކުރާ ސަރުކާރުގެ އޮފިޝަލުންނާއިމެދު ފިޔަވަޅު އެޅުމަށް އެމްއާރްއެމްގެ ރައީސް ފާރިސް މައުމޫން ގޮވާލައްވައިފިއެވެ.
އިންޑިއާގެ ބޮޑުވަޒީރު ނަރޭންދްރަ މޯދީއަށް ކުޑައިމީސްކޮށް ސަރުކާރުގެ ބައެއް އިސް އޮފިޝަލުންނާއި ހިންގާ ޕާޓީގެ އިސް މެމްބަރުންވެސް ޓްވިޓާރގައި ޕޯސްޓުތަކެއް ކޮށްފައިވާ މައްސަލައިގައި އެ ގައުމުގެ ރައްޔިތުން ރާއްޖެ ބޮއިކޮޓުކުރުމަށް ގޮވާލައި ކެމެޕްއިންނެއް ފަށާފައިވާއިރު، ފާރިސްވަނީ ހިނގަމުންދާ ކަންކަމާއިމެދު ކަންބޮޑުވުންތައް ހިއްސާކުރައްވާފައެވެ.
އޭނާ ވިދާޅުވީ، ބޭރު ގައުމުތަކުގެ އިސްވެރިންނާއިމެދު އިހުތިރާމް ކުޑަކޮށް އަމަލުކުރާ ސަރުކާރުގެ އޮފިޝަލުންނާއިމެދު ފިޔަވަޅު އަޅަންޖެހޭނެކަމަށެވެ. އޭނާ ވިދާޅުވީ، އެފަދަ އަމަލަކަށް ފިޔަވަޅު ނާޅައިފި ނަމަ ރާއްޖޭގެ ސަރުކާރުން އެ ވާހަކަތަކަށް ތާއީދުކުރާކަމަށް ބުނުމުގެ ފުރުސަތު އޮތްކަމަށެވެ.
އިންޑިއާ އާއި ދެމެދު އުފެދިފައިވާ މައްސަލަ އިތުރަށް ގޯސްވެދާނެ ފުރުސަތު އޮތްކަމަށް ފާރިސް ފާހަގަކުރެއްވިއިރު، ސަރުކާރުންވަނީ އެ މައްސަލައިގައި ސަރުކާރުގެ ވިސްނުންތައް ތަފާތުކަން ހިއްސާކޮށް ބަޔާނެއް ނެރިފައެވެ. ފޮރިން މިނިސްޓްރީއިން ބުނެފައިވާގޮތުން ހިއްސާ ކޮށްފައިވަނީ އަމިއްލަ ފަރާތްތަކެއްގެ ވިސްނުންތަކެއްކަމަށެވެ. އަދި އެއީ ސަރުކާރުގެ ވިސްނުން ނޫންކަމަށްވެސް ބުނެފައިވެއެވެ.
advertisment