އިދިކޮޅު ފަރާތްތަކުން ކިތަންމެ ދުންޏެއް އުކާ ފަހަތަށް ޖައްސަން މަސައްކަތް ކުރެއްވިކަމުގައިވިޔަސް ހައްޤަށް ނަސްރު ދެއްވާ ލަޝްކަރުގެ ހިތްވަރު ބައްޔައް ނުވާނެ ކަމަށް ކުރީގެ ބަންޑާރަ ނައިބު އަދި ޕީއެންސީގެ މޭޔަރ ކެންޑިޑޭޓް އައިޝަތު އާޒިމާ ޝަކޫރު ވިދާޅުވެއްޖެއެވެ.
ގަލޮޅު ކަންމަތީގައި ބޭއްވި މާލެ ސިޓީގެ މޭޔަރު އަދި މާލޭގެ 3 ދާއިރާއަށް ވާދަކުރާ ކެނޑިޑޭޓުންގެ ކެމްޕެއިން ޖަލްސާގައި އާޒިމާ ވިދާޅުވީ މޭޔަރުގެ ގޮނޑިއަށް ވާދަކުރެއްވުމުން އިދިކޮޅު ފަރާތްތަކުން އެކަމަނާ ފަހަތަށް ޖައްސަށް ވަރަށް މަސައްކަތް ކުރަމުން ގެންދާ ކަމަށެވެ. އެހެންނަމަވެސް ކިތަންމެ ހަމަލާއެއް އަމާޒު ކުރަމުންދިޔަސް ހައްޤަށް ނަސްރުލިބޭނެ ކަމަށް އާޒިމާ ވަނީ ވިދާޅުވެފައެވެ.
އާޒިމާ ވިދާޅުވީ ނޫހެއްގައި އެކަމަނާއާ ދެކޮޅަށް ދޮގު ވާހަކަތައް ފެތުރި މައްސަލައިގައިވެސް އެންމެ ފަހުން ނަސްރު ލިބިގެންދިޔައީ ހައްޤު ތެދަށް ކަމަށެވެ.
މި މައްސަލައާއި ގުޅިގެން ސިވިލް ކޯޓުން ނެރުނު ބަޔާނުގައި ބުނެފައިވަނީ ނޫހެއްގައި ޝާއިއުކޮށްފައިވާ ލިޔެކިޔުންތަކަކީ ސައްޙަ ލިޔުންތަކެއް ނޫން ކަމަށާއި އާޒިމާ އާ ދެކޮޅަށް އެއްވެސް މައްސަލައެއް އެކޯޓުގައި ރަޖިސްޓްރީކޮށްފައި ނުވާ ކަމަށެވެ. އެހެންކަމުން އެނޫހާއިމެދު ފިޔަވަޅު އަޅަން ސިވިލް ކޯޓުން ވަނީ ނިންމާފައެވެ.