މާލޭގެ މޭޔަރުކަމަށް ވާދަކުރައްވާ ކެންޑިޑޭޓުންގެ މެދުގައި ސަންގުން ކުރިއަށް ގެންދާ “ސަންގު ބަހުސް”ގެ ފަހު އެޕިސޯޑް މިރޭ ބޭއްވުމަށް ނިންމައިފިއެވެ.
ކޮންމެ ހަފްތާއަކު ވެސް ސިލްސިލާކޮށް ބަހާލައިގެން ކުރިޔަށް ގެންދިއުމަށް ނިންމާފައިވާ މި ބަހުސްގެ ދައުވަތު މާލޭގެ މޭޔަރުކަމަށް ވާދަކުރާ ކެންޑިޑޭޓުންނަށް ފޮނުވާފައިވާއިރު އެމްޑީޕީގެ ފަރާތުން ވާދަކުރައްވާ ކެންޑިޑޭޓް އާޒިމްވަނީ ބަހުސް ގައި ބައިވެރިނުވާނެ ކަމަށް އަންގާފައެވެ. އަދި އާޒިމް ވަނީ ސަންގަށް އިންޒާރުވެސް ދީފައެވެ. އެހެންނަމަވެސް އެހެން ކެންޑިޑޭޓުން ވަނީ ބަހުސްގައި ބައިވެރިވާނެކަން ސަންގަށް ކަށަވަރުކޮށްދެއްވާފައެވެ.
މި ބަހުސްގައި ކެންޑިޑޭޓުންގެ ސިޔާސަތުތަކާއި، މާލެއަށް ދިމާވެފައިވާ އިޖްތިމާއީ އެކި މައްސަލަތައް ހައްލު ކުރުމުގައި ގެންގުޅުއްވާ ވިސްނުން ހާމަކުރުމުގެ ފުރުސަތު ލިބިގެން ދާނެ އެވެ. ހާއްސަކޮށް މާލެއަށް ދިމާވެފައިވާ އެންމެ ބޮޑު މައްސަލައެއްގެ ގޮތުގައި ފާހަގަކުރެވޭ ބޯހިޔާވަހިކަމުގެ މައްސަލައާއި މާލޭގެ ޓްރެފިކް ހައްލު ކުރުމުގެ ކަންކަމުގެ މައްޗަށް ވެސް މައުޟޫއުއެއް ކަނޑައެޅި، އެކަމަށް ވާހަކަ ދެކެވޭނެ އެވެ.
ބަހުސްގެ ފަހު އެޕިސޯޑުގައި އަލިއަޅުވާލާނީ މާލެ ސިޓީގެ މޭޔަރަކީ ވަކި ޕާޓީއަކަށް ނިސްބަތްވާން ޖެހޭ ބޭފުޅެއްތޯއާއި އެކަމާއި ގުޅޭގޮތުން މޭޔަރަލް ކެންޑުޑޭޓުން ގެންގުޅުއްވާ ވިސްނުންތަކާއި އެކުލަވާލާ ސިޔާސަތުތަކުގެ މައްޗަށެވެ. މި ބަހުސް ފެށުމަށް ހަމަޖެހިފައިވަނީ މިރޭ 21:15 ގައެވެ.
މާލޭގެ މޭޔަރުކަމަށް ވާދަކުރައްވާ ކެންޑިޑޭޓުންނަކީ:
ޑިމޮކްރެޓްސް: ގަލޮޅު އުތުރު ދާއިރާގެ ކައުންސިލް މެމްބަރު ސައިފް ފާތިހު
ޕީޕީއެމް/ޕީއެންސީ: ކުރީގެ ބަންޑާރަ ނައިބު އައިޝަތު އާޒިމާ ޝަކޫރު
އެމްޑީޕީ: އެމްޓީސީސީގެ ކުރީގެ ސީއީއޯ އާދަމް އާޒިމް
އަމިއްލަ ގޮތުން ވާދަކުރާ ކެންޑިޑޭޓު: ޝުއައިބު އަލީ (ފުރަހަނި ޝުއައިބު)
ޕީއެންއެފްގެ އެންޑޯސްމެންޓް: ކުރީގެ ކޮމިޝަނާރ އޮފް ޕޮލިސް ހުސެއިން ވަހީދު
“ސަންގު ބަހުސް” އަކީ ރާއްޖޭގެ މީޑިއާއަކުން ގެނެސް ދޭ އެންމެ ވަރުގަދަ ސިޔާސީ ޕްރޮގްރާމެވެ. އަދި މި ޕްރޮގްރާމަށް ވަނީ މޯލްޑިވްސް ބްރޯޑްކާސްޓިން ކޮމިޝަނުން ދިން، އެވޯޑުގައި އެންމެ މަގުބޫލު ކަރަންޓް އެފެއާޒް އެވޯޑު ލިބިފަ އެވެ. އަދި މީގެއިތުރުން 2023 ގެ ރިޔާސީ ކެންޑިޑޭޓުންގެ މެދުގައި ވެސް ސަންގު ބަހުސް ކުރިޔަށް ގެންދެވުނެވެ.