އިންޑިއާ ސިފައިން ރާއްޖޭގެ ފަސްގަނޑުން ބޭލުމުގެ މަސައްކަތްތައް އަވަސްކުރުމަށް އެއްބަސްވެފައިވާކަމަށް ފޮރިން މިނިސްޓްރީއިން ބުނެފިއެވެ.
މާޗު 15 ވަނަ ދުވަހުގެ ނިޔަލަށް އިންޑިއާ ސިފައިން ބޭލުމަށް ރައީސް ޑރ މުހައްމަދު މުއިއްޒު ރަސްމީގޮތުން އެދިވަޑައިގެންފައިވާއިރު، ފޮރިން މިނިސްޓްރީއިންވަނީ އިންޑިއާގެ ސަރުކާރުގެ މަންދޫބުންނާއިއެކު ކުރިއަށް ގެންދިޔަ ބައްދަލުވުމާއި ގުޅޭ ބައެއް ތަފްސީލުތައް ހިއްސާކޮށްފައެވެ.
މިނިސްޓްރީއިން ބުނެފައިވާގޮތުން، ދެ ގައުމުންވެސްވަނީ މިހާރު އޮތް ގުޅުމުގެ މައްޗަށް އަލިއަޅުވައި މަޝްވަރާތައްކޮށްފައިކަމަށާއި ދެ ގައުމުގެ މަސްލަހަތު ހިމެނޭ ގިނަ މައުޟޫތަކެއްގެ މައްޗަށް އަލިއެޅުވިފައިވާކަމަށްވެސް ބުނެފައިވެއެވެ.
މިނިސްޓްރީއިން ބުނެފައިވާގޮތުން، ދެ ގައުމުންވެސް ވަނީ އިތުރަށް ގުޅުންތައް ބަދަހިކުރުމަށް ތައްޔާރުކަން ހިއްސާކޮށްފައެވެ. އަދި ރާއްޖޭގައި ތިބި އިންޑިއާ ސިފައިން ބޭލުމުގެ މަސައްކަތްތައް އަވަސްކުރުމަށް އެއްބަސްވުމަކަށް އާދެވިފައިވާކަމަށްވެސް ބުނެފައިވާއިރު، ދެ ފަރާތަށްވެސް ފަސޭހަ ވަގުތެއްގައި ދެވަނަ ބައްދަލުވުމެއް ބޭއްވުމަށްވެސް އެއްބަސްވެވިފައިވާކަމަށް މިނިސްޓްރީއިން ބުނެފައިވެއެވެ.
advertisment