ޖޭއެސްސީގައި ސުޕްރީމް ކޯޓު ތަމްސީލު ކުރައްވަން ހުސްނުއްސޫއޫދު ކަނޑައަޅައިފި

ޖުޑިޝަލް ސާވިސް ކޮމިޝަނުގައި ސުޕްރީމް ކޯޓު ތަމްސީލު ކުރައްވަން ފަނޑިޔާރު ހުސްނުއްސޫއޫދު ހަމަޖަސައްއިފިއެވެ.

ސުޕްރީމް ކޯޓުން އެކްސްގައި ހިއްސާ ކުރި ޕޯސްޓެއްގައި ވަނީ ޖޭއެސްސީގައި ސުޕްރީމް ކޯޓު ތަމްސީލު ކުރައްވާނީ ފަނޑިޔާރު ހުސްނުއްސޫއޫދު ކަމަށް ބުނެފައެވެ. ނިމިދިޔަ ހަތަރު އަހަރު ޖޭއެސްސީގައި ސުޕްރީމް ކޯޓު ތަމްސީލް ކުރައްވައިފައިވަނީ ފަނޑިޔާރު އާއިޝާ ޝުޖޫން މުހައްމަދު އެވެ.

ޖޭއެސްސީގެ ކޮމްޕޮޒިޝަން އަށް ބަލާއިރު އުއްތަމަ ފަނޑިޔާރު ފިޔަވައި ސުޕްރީމް ކޯޓުން ކަނޑައަޅާ ފަނޑިޔާރެއްގެ އިތުރުން، ހައި ކޯޓު ތަމްސީލު ކުރައްވާ އެ ކޯޓުގެ ފަނޑިޔާރަކާއި، ދަށު ކޯޓުތަކުން ތަމްސީލު ކުރައްވާ ދަށު ކޯޓެއްގެ ފަނޑިޔާރަކު ތިއްބަވައެވެ. ގާނޫނީ ވަކީލުންގެ ތެރެއިން އިންތިހާބު ކުރާ ވަކީލެއްގެ އިތުރުން ދައުލަތުގެ ބަންޑާރަ ނައިބު ވެސް އިންނަވައެވެ. އަދި މީގެއިތުރުން ރައީސުލްޖުމްހޫރިއްޔާ އައްޔަންކުރައްވާ މެންބަރަކާއި، ރައްޔިތުންގެ މަޖިލީހުގެ ރައީސްއާއި، ސިވިލް ސާވިސް ކޮމިޝަންގެ ރައީސްއާއި، ރައްޔިތުންގެ މަޖިލީހުން ކަނޑައަޅާ އެ މަޖިލީހުގެ މެންބަރަކާއި، މަޖިލީހުން ކަނޑައަޅާ އާންމުންގެ މީހެއް ވެސް ޖޭއެސްސީގައި ހިމެނެއެވެ.

ފަނޑިޔާރު ހުސްނުއްސޫއޫދަކީ 2011 ވަނަ އަހަރު ގާނޫނީ ދާއިރާއަށް ކޮށްދެއްވާފައިވާ ހިދުމަތްތަކުގެ އަގުވަޒަން ކޮށްދެއްވުމުގެ ގޮތުން ދިވެހި ސަރުކާރުން ވަނ ހިތްވަރު ދިނުމުގެ ޤައުމީ އެވޯޑް ދެއްވާފައިވާ ބޭފުޅެކެވެ. މި އެވޯޑު 1979 ވަނަ އަހަރުންސުރެ ދެވެމުން އަންނައިރު، ގާނޫނީ ދާއިރާއަށް ހިދުމަތް ކުރެއްވުމުގެ ރޮނގުން މި އެވޯޑު ލިބިލައްވާފައިވާ ހަމައެކަނި ފަރާތަކީ ހުސްނުއްސުއޫދެވެ.

1997 އިން 1999 އަށް ސިވިލް ކޯޓުގެ އިސް ގާޒީކަމާއި، 2009 އިން 2010 އަށް ކްލެމެންސީ ބޯޑްގެ ރައީސް ކަމާއި، 2009 އިން 2010 އަށް ދިވެހިރާއްޖޭގެ އެޓަރނީ ޖެނެރަލް ކަމާއި އަދި 2011 އިން 2019 އަށް މޯލްޑިވްސް ލޯ އިންސްޓިޓިއުޓްގެ ރައީސް ކަމަކީ ހުސްނުއްސޫއޫދު ފުރުއްވާފައިވާ ފާހަގަކޮށްކެވޭ ބައެއް މަގާމްތަކެވެ. ހުސްނުއްސު އޫދު ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުކަމުގެ މަގާމަށް އައްޔަން ކުރެވުނީ 08 ޑިސެންބަރު 2019 ގައެވެ.