“އަޅުގަނޑު ވަރަށް ހިތާމަކުރަން… މިއަދު ވެސް މާލޭގައި ބަޔަކު މުޒާހަރާ ކޮށްފި. އަޅުގަނޑުމެންގެ ތެރޭ ތިއްބެވި ވަރަށް އިސް ބޭފުޅުން މާސްކު ވެސް ނާޅާ އުޅުއްވި މަންޒަރުވެސް ފެންނިގެން ހިނގައްޖެ. އެއީ ވަރަށް ހިތާމަވެރި ކަމެއް،” ރައީސް
އިދިކޮޅުން މާލޭގައި ކުރިޔަށް ގެންދިޔަ މުޒާހަރާގައި، އިދިކޮޅު ޕީޕީއެމްގެ އިސްލީޑާޝިޕްގެ ބޭފުޅުން ވަނީ ބައިވެރިވެފައެވެ. އެހެން ނަމަވެސް އެ އެއްވުމުގައި އިޖްތިމާއީ ގައިދުރުކަމަށް އެއްވެސް މިންވަރަކަށް ސަމާލުކަން ދީފައި ނުވެއެވެ.
ނޫސްވެރިންނާއި ވާހަކަ ދައްކަވަމުން ރައީސް ވިދާޅުވެފައިވަނީ، ސިއްހީ އިދާރާތްތަކުގެ އެންގުންތަކުގައި ގާނޫނުގެ ބާރުވެރިކަން ހުންނާނެ ކަމަށާއި އެ އެންގުންތަކާއި ހިލާފުވުމަށް ފުރުސަތުތަކެއް ނުދެވޭނެ ކަމަށެވެ. އަދި ސަރުކާރުން އަޅަންޖެހޭ ފިޔަވަޅު ވެސް އަޅުއްވާނެކަމަށް ރައީސް ވިދާޅުވިއެވެ.
އިދިކޮޅު ކޯލިޝަނުން މިއަދު ބޭއްވި ސައިކަލް ބުރުގައި އެޗްޕީއޭގެ މިންގަނޑުތަކާއި ހިލާފުވި މައްސަލަ ބަލާނެ ކަމަށް ފުލުހުން ވަނީ ބުނެފައެވެ. މައްސަލައިގައި މީޑިއާތަކަށް ފޮނުވި މެސެއްޖެއްގައި ފުލުހުން ބުނެފައިވަނީ މާލޭގައި ކުރިޔަށް ގެންދިޔަ ސިޔާސީ ހަރަކާތުގައި ސިއްހީ އިދާރާގެ އެންގުންތަކާއި، އަދި މިންގަނޑުތަކާއި އެއްގޮތަށް ގައިދުރުކަން ނުބަހައްޓާ ހަރަކާތްތެރިވުމާއި މާސްކު ނާޅާ އުޅެފައިވާކަން ފާހަގަ ކުރެވިފައިވާ ކަމަށެވެ. އަދި އެކަމާއި ގުޅިގެން ބަލަންޖެހޭ ކަންކަން ބެލުމަށްފަހު އަޅަންޖެހޭ ފިޔަވަޅުތައް އަޅަމުން ގެންދާނެ ކަމަށެވެ.
advertisment