2019 ވަނަ އަހަރު އެސްޓީއޯއަށް އާމްދަނީގެ ގޮތުގައި ލިބުނު ފައިދާގެ ތެރެއިން ކޮންމެ ހިއްސާއަކަށް 58 ރުފިޔާ ބެހުމަށް ކުންފުނީގެ ބޯޑުން މިއަދު ފާސްކޮށްފިއެވެ.
ހިއްސާއަކަށް 58 ރުފިޔާ ބަހަން އެސްޓީއޯއިން ނިންމާފައިވަނީ އެ ކުންފުނީގެ އަހަރީ އާއްމު ޖަލްސާގައެވެ.
ކޮވިޑުގެ ސަބަބުން ޖަލްސާތަކާއި އެއްވުންތައް ކުރިޔަށް ނުގެންދެވޭތީ އަހަރީ އާއްމު ޖަލްސާ ކުރިޔަށް ގެންގޮސްފައިވަނީ މައިކްރޮސޮޕްޓް ޓީމްސް ލައިވް އިވެންޓްސް މެދުވެރިކޮށެވެ.
#STOAGM2019 pic.twitter.com/AecJUV1xC4
— STO Plc (@stoplc) August 30, 2020
އޮންލައިންކޮށް ކުރިޔަށް ގެންދިޔަ އެ ޖަލްސާގައި 52 ހިއްސާދާރުން ބައިވެރިވިއެވެ. އަދި ޕްރޮކްސީގެ ގޮތުގައި 41 ހިއްސާދާރުން ރެޖިސްޓްރީވެ ވަނީ ބައިވެރިވެފައެވެ.
ހިއްސާއަކަށް 58 ރުފިޔާ ބަހަން ވޯޓުން ފާސްކޮށްފައިވަނީ ބައިވެރިވި 52 ހިއްސާދާރުންގެ އަގުލަބިއްޔަތުންނެވެ.
އަހަރީ އާއްމު ޖަލްސާގައި ކުންފުނީގެ މެނޭޖިން ޑިރެކްޓަރު ހުސެއިން އަމްރު ދެއްކެވި ވާހަކައިގައި ވަނީ މިދިޔަ އަހަރަކީ ކުންފުނީގެ ތާރީހުގައި ވެސް މާލީ ގޮތުން އެންމެ ރަނގަޅު އެއް އަހަރުކަން ފާހަގަ ކުރައްވާފައެވެ. އަދި އިންފްރާސްޓްރަކްޗާ ރަނގަޅު ކުރުމަށް މަސައްކަތްތަކެއް ކުރެވުނުކަމަށް ވިދާޅުވިއެވެ.
އެސްޓީއޯއިން އާއްމުކޮށްފައިވާ ކުންފުނީގެ މާލީ ރިޕޯޓުގައިވާ ގޮތުން 2019 ވަނަ އަހަރު އެސްޓީއޯގެ ޖުމްލަ ފައިދާ އޭގެ ކުރީ އަހަރާ އަޅައި ބަލާއިރު 13 އިންސައްތަ ވަނީ އިތުރުވެފައެވެ. އަދި ކުންފުނީގެ ހިންގުމުގެ ފައިދާ ވަނީ 80 އިންސައްތަ އިތުރުވެފައިވާކަން ވަނީ ފާހަގަކޮށްފައެވެ.