ޖަލުގައި ބަޑި ޖެހި ހާދިސާއާ ގުޅޭ ހަގީގަތް ހާމަކުރެއްވުމުން މައުމޫންގެ ޝުކުރު އިބްރާހިމް ދީދީ އަށް!

ސެޕްޓެމްބަރު 19، 2003 ވަނަ އަހަރު މާފުށި ޖަލުގައި ހިނގާދިޔަ ހަމަނުޖެހުންތަކާ ގުޅިގެން ބަޑި ޖަހަން ކުރީގެ ރައީސް މައުމޫން އަބްދުލްގައްޔޫމް އަމުރު ނުކުރައްވާ ކަމަށް ބްރިގޭޑިއާ ޖެނަރަލް (ރިޓަޔާޑް) އިބްރާހިމް މުހައްމަދު ދީދީ ވިދާޅުވުމާ ގުޅިގެން މައުމޫން އެމަނިކުފާނަށް ޝުކުރު އަދާކުރައްވައިފިއެވެ.

އީވާން ނަސީމަށް އަނިޔާކޮށް މަރާލުމާއި އަދި ބަޑިޖަހައި އިތުރު ގައިދީން މެރި ޖަރީމާއަށް 17 އަހަރު ފުރުމާ ގުޅިގެން އެމްޑީޕީގެ އިސްވެރިންނާއި އެ ޕާޓީގެ އާންމު މެމްބަރުން އަންނަނީ ރައީސް މައުމޫނަށް ފާޑުކިޔުން އަމާޒުކުރަމުންނެވެ.

އެގޮތުން ފޭދޫ ދާއިރާގެ މެމްބަރު މުހައްމަދު ނިހާދު ވަނީ ޖަލުގައި ބަޑި ޖެހީ ރައީސް މައުމޫންގެ އޯޑަރަށް ކަމަށާއި ބަޑި ޖެހި މީހުން އުމުރަށް ޖަލަށްލީ ނަމަވެސް ބަޑިޖަހަން އޯޑަރު ކުރި މީހާ އުޅެމުންދަނީ އުފަލާއި އަރާމުގައި ކަމަށް ވިދާޅުވެފައެވެ.

ނިހާދުގެ މި ވާހަކަތައް ދޮގު ކުރައްވައި ދީދީ ވިދާޅުވީ މަޖިލީހުގެ މެމްބަރަކަށް ހުންވައިގެން އެފަދަ އިލްޒާމުތައް އަޅުވަން ނުވާނެ ކަމަށެވެ. އެގޮތުން އެ ދުވަހު އޭރު އެންއެސްއެސްގެ ޑިއުޓީ އޮފިސަރަކަށް ކަން ދިމާވި ގޮތުން ހުރީ އޭނާ ކަމަށާއި ޖަލުގައި ތިބި ގައިދީންނާ ދެކޮޅަށް ލީތަލް ހަތިޔާރު ބޭނުން ކުރަން މައުމޫން އަމުރުނުކުރައްވާ ކަމަށެވެ.

ދީދީގެ މި ވާހަކަތަކާ ގުޅިގެން މައުމޫން ވަނީ ހަގީގަތް ހާމަކުރެއްވީތީ ދީދީ އަށް ޝުކުރު އަދާކުރައްވާ ޓްވީޓެއް ކުރައްވާފައެވެ.

Haqeeqaiy haama kurevveethee shukuru dhannavan. https://t.co/gemGJgnoZu

— Maumoon Abdul Gayoom (@maumoonagayoom) September 20, 2020

އީވާން ނަސީމް މަރާލާފައިވަނީ 2003 ވަނަ އަހަރުގެ ސެޕްޓެމްބަރު މަހުގެ 19 ވަނަ ދުވަހު ސިފައިން ތަޅައި އަނިޔާކޮށްގެންނެވެ. ޖަލުގައި ބަޑިޖެހި ހާދިސާ އައީ ޖެހިގެން އައި ސެޕްޓެމްބަރު 20 ވަނަ ދުވަހު އެވެ. އެ ދެ ހާދިސާ އަކީ ވެސް މައުމޫންގެ ވެރިކަމާ ދެކޮޅަށް ރައްޔިތުން ނިކުމެ ފެށި އިސްލާހުގެ ހަރަކާތުގެ ފެށުމެވެ.