ކޮރޮޕްޝަނަށް ހުރި ހިރާސްތައް ކުޑަކުރަން މާލިއްޔަތު ގަވައިދަށް ގެންނަން ޖެހޭ ބަދަލުތައް މި އަންނަނީ ގެންނަމުން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިނިސްޓަރު އަމީރު ކުރެއްވި ޓްވީޓެއްގައި ވިދާޅުވީ ކޯޕަރޭޓިވް ސޮސައިޓީ އަދި ގައުމީ ޖަމިއްޔާއަށް ސިންގަލް ސޯސްކޮށް ދެވޭ ގޮތަށް ކުރިން އޮތް މާއްދާ މިހާރު ވާނީ ބަދަލު ކޮށް ގެޒެޓު ކުރެވިފައި ކަމަށެވެ.
“އަދި ފިނެންސް މިނިސްޓްރީން އިސްނަގައިގެން އެޓާނީ ޖެނެރަލް، އޮޑިޓަ ޖެނެރަލް އަދި އޭސީސީ ވެސް ހިމެނޭ ގޮތަށް ކޮމިޓީއެއް ހެދި، އެ ކޮމިޓީގައި އެންޑޯސްމެންޓްއާ އެއްކޮށް މިހާރު މި ގޮތަށް ބަދަލުކޮށް ގެޒެޓު ކުރަން ވަނީ ފޮނުވިފައި،” މިނިސްޓަރު ވިދާޅުވިއެވެ.
Corruption aa huri hiraas tha kuda kuran maaliyath gavaidh aa gennan jehey badhal tha mi annanee gennamun. Cooperative society adhi gaumee jamiyya aa single source ko dhevey gotha kurin oi maadhaa mihaaru vaanee badhal koffa. https://t.co/URxDvmluef
— އިބްރާހިމް އަމީރު (@iameeru) September 24, 2020
މާލިއްޔަތު ގަވައިދަށް އިސްލާހު ގެނައުމަށް މިނިސްޓަރު އަމީރު، އޮޑިޓަރ ޖެނެރަލް ހަސަން ޒިޔަތު އާއި އެޓާނީ ޖެނެރަލް އިބްރާހީމް ރިއްފަތުގެ އިތުރުން އޭސީސީގެ ނާއިބު ރައީސް ފާތިމަތު އަނޫލާ އާއި ވަނީ މަޝްވަރާ ކުރައްވާފައެވެ. އަދި މި މަޝްވަރާތަކުގެ ތެރެއިން ހުރިހާ އިދާރާއެއް ހިމެނޭ ގޮތަށް ކޮމެޓީއެއް އެކުލަވާލާ އެ މަސައްކަތް ފެށުމަށް ނިންމާފައިވާ ކަމަށް ފިނޭންސުން ބުންޏެވެ.
ފިނޭންސް މިނިސްޓްރީ އިން ބުނެފައިވާ ގޮތުގައި މިފަހަރު މާލިއްޔަތު ގަވައިދު މުރާޖައާ ކުރެވޭއިރު އޮޑިޓަރ ޖެނެރަލްގެ ރިޕޯޓްތަކުގައި ފާހަގަވާ ކަންތައްތަކާއި، އެންޓި ކޮރަޕްޝަން ކޮމިޝަންގެ ތަހުގީގުތަކުގައި ފާހަގަ ކުރެވޭ ނުކުތާތަކުގެ އިތުރުން ދައުލަތް ހިންގުމުގައި އެންމެ ފައިދާ ބޮޑުވާނެ ކަމަށް އެޓާނީ ޖެނެރަލްއަށް ފާހަގަ ކުރެވޭ ކަންތައްތަކަށް ވަރަށް ބޮޑަށް ރިއާޔަތް ކުރެވިގެންދާނެ ކަމަށެވެ.
ދައުލަތުގެ މާލިއްޔަތުގެ ގަވައިދަށް ދާދިފަހުންވަނީ ތިން ވަނަ އިސްލާހެއް ގެނެސް ޖުލައި ހަތަރު ވަނަ ދުވަހު ގެޒެޓްގައި ޝާއިއު ކޮށްފަ އެވެ. އެފަހަރު ގެނެވުނު އިސްލާހުތަކުގައި މާލިއްޔަތު ގަވައިދަށް އަމަލު ކުރާ ދައުލަތުގެ އިދާރާތަކަށް ފާހަގަ ކުރެވިފައިވާ ކަންތައްތަކާއި 2019 ވަނަ އަހަރު ފިނޭންސް މިނިސްޓްރީން ބޭއްވި “ބީލަންވެރިންގެ މަހާސިންތާ” ގައި ބީލަންވެރިން ފާހަގަ ކުރި މުހިއްމު ގިނަ ކަންތައްތަކެއް ހިމެނެ އެވެ.