ކޮވިޑް-19ގެ މި ހާލަތުގައިވެސް ދުޅަހެޔޮ އާދަތައް އިސްކުރުމަށް ރައީސް އިބްރާޙިމް މުހައްމަދު ސޯލިހު އިލްތިމާސް ކުރައްވައިފިއެވެ.
މިއަދު ފާހަގަކުރަމުންދާ ދުނިޔޭގެ ހިތުގެ ދުވަހުގެ މުނާސަބަތުގައި ކުރެއްވި ޓުވީޓެއް ރައީސް ވިދާޅުވީ، މުޅި ދުނިޔެ މިހާރު ހަނގުރާމަ ކުރަމުންދާ ކޮވިޑް-19ގެ ބަލިމަޑުކަމާއެކު އިންސާނުންގެ ދިރިއުޅުމަށް ބޮޑެތި ބަދަލުތަކެއް ގެނުވާ، އާއްމު ދިރިއުޅުމަށް ކުރާ ކަންކަން މަޑުޖެހިފައިވާކަމަށާއި ހާސްކަމާއި މާޔޫސްކަން ކޮންމެ ދުވަހަކުހެން ތަޖުރިބާކުރަން ޖެހިފައިވާކަމަށެވެ.
ރައީސް ވިދާޅުވީ ދުނިޔޭގެ ހިތުގެ ދުވަސް މިއަދު ފާހަގަކުރާއިރު، ދުޅަހެޔޮކަމާއި ހަރަކާތްތެރި ދިރިއުޅުމަކަށް ބޭނުންވާނެ ރަނގަޅު އާދަތައް ކުރިއަރުވަންޖެހޭކަމަށެވެ. އަދި ހިތުގެ އެކި ބަލިތަކުން ރައްކާތެރިވުމަށް ކޮންމެ މީހަކުވެސް ގަދައަޅައި މަސައްކަތްކުރެއްވުމަށް އެމަނިކުފާނު އިލްތިމާސްކުރެއްވިއެވެ.
Covid-19 has slowed down the pace of life, while adding stress and anxiety to our daily experience. On this #WorldHeartDay let us stay active and adopt healthier lifestyles and, use ❤️ to beat back heart diseases, while weathering the storm of this pandemic. @TinyHeartsMV
— Ibrahim Mohamed Solih (@ibusolih) September 29, 2020
ދުނިޔޭގެ ހިތުގެ ދުވަހުގެ މުނާސަބަތުގައި ހެލްތް މިނިސްޓްރީ ހިންގެވުމާ ވަގުތީގޮތުން ހަވާލުވެވަޑައިގެން ހުންނެވި ހައުސިން މިނިސްޓަރު މުޙައްމަދު އަސްލަމް ވެސް ވަނީ ޚާއްސަ ވީޑިއޯ މެސެޖެއް ދެއްވާފައެވެ.
މިނިސްޓަރިު އަސްލަމް ދެއްވި މެސެޖުގައި ވިދާޅުވީ މިފަދަ ދުވަހެއްގައި ހިތައް އަނިޔާވާ އެންމެހާ ކަންކަމުން ދުރުހެލިވުމަށް އަޒުމް ކަނޑައަޅަންޖެހޭކަމަށެވެ. އަދި ހިތުގެ ވިންދުޖެހުން ދުޅަހެޔޮކޮށް ބެހެއްޓުމަކީ މުހިއްމުކަމެއްކަމަށާއި، އުފާވެރި ހަޔާތެއް ލިބޭނީ ދުޅަހެޔޮ ހިތަކާއެކުގައިކަން މިނިސްޓަރު ފާހަގަކުރެއްވިއެވެ.
advertisment