ޑޯނިޔާ މަތިންދާބޯޓާއިއެކު އެމްއެންޑީއެފްގެ މަސައްކަތްތަކަށް ކުރިއެރުން ލިބިގެންދާނެކަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
މީޑިޔާތަކަށް މައުލޫމާތު ދެއްވަމުން އެމްއެންޑީއެފްގެ މީޑިޔާ އޮފިޝަލް ވިދާޅުވީ މިއީ 2016 ވަނަ އަހަރުން ފެށިގެން އިންޑިއާއިން ދިވެހިރާއްޖެއަށް ހޯދުމަށް މަސައްކަތްކުރެވެމުންދިޔަ ބޯޓެއްކަމަށެވެ. މިމަތިންދާބޯޓު ބޭނުންކުރުމަށް ހަމަޖެހިފައިވަނީ އެމްއެންޑީއެފްގެ ކޯސްޓްގާޑްގެ ބެލުމުގެ ދަށުން، ދިވެހިރާއްޖޭގެ ކަނޑުގެ ސަރަޙައްދު ބެލެހެއްޓުމަށާއި، ދިވެހިރާއްޖޭގެ މަސްކަނޑުތަކުން ޤަވާޢިދާ ޚިލާފަށް މަސްވެރިކަންކުރާ ފަރާތްތައް މޮނިޓަރކުރުމަށާއި، ދިވެހިރާއްޖޭގެ ކަނޑުގެ ސަރަޙައްދު ބޭނުންކޮށްގެން ކުރެވޭ ޑްރަގްސްއާއި މަނާ އެހެނިހެން ތަކެތީގެ ވިޔަފާރިއާއި އިންސާނީ ވަގުފާރި ހުއްޓުވުމަށާއި، ކަނޑުމަތީގައި ޙާލުގައި ޖެހޭ ފަރާތްތައް ހޯދުމަށާއި، އެއްތަނުން އަނެއްތަނަށް ބަލިމީހުން އުފުލުމަށާއި އަދި އެހެނިހެން އިންސާނީ އެހީ ފޯރުކޮށްދިނުމަށްކަމަށް މީޑިޔާ އޮފިޝަލް ވިދާޅުވިއެވެ.
މިމަތިންދާ ބޯޓު ރާއްޖެއަށް ގެނެވުމާއި ގުޅިގެން މިނިސްޓަރ ވަނީ އިންޑިޔާއަށް ޝުކުރު އަދާކުރައްވާފައެވެ. އަދި މިއާއެކު އެމްއެންޑީއެފްއިން ކުރަމުންދާ މަސައްކަތްތަކަށް ކުރިއެރުމެއް ލިބިގެންދާނެކަމަށް މިނިސްޓަރ ވިދާޅުވިއެވެ.
Grateful for India’s generosity @HCIMaldives This will greatly enhance @MNDF_Official ‘s ability to protect our EEZ, enhance search & rescue efforts & render humanitarian relief efforts. The aircraft looks good in the new @MNDF_Official Air Wing colours. Thank you #India https://t.co/XwyxITVbHK
— Mariya Didi ???? (@MariyaDidi) September 29, 2020
ރާއްޖޭގައި ހުންނަ އިންޑިޔާ ހައި ކޮމިޝަނުން ބުނީ، ބޯޓުގައި ހުންނާނީ އެމްއެންޑީއެފްގެ ކުލަތައް ކަމަށެވެ. އަދި ބޯޓު އޮޕަރޭޓް ކުރަމުންދާނީ ދިވެހި ޕައިލަޓުންކަމަށެވެ.
ރާއްޖެއަށް މިބޯޓު ގެނެސްފައިމިވަނީ، ރާއްޖޭގައި އިންޑިޔާ ސިފައިން ހަރަކާތްތެރިވަމުންދާކަމުގެ ތުހުމަތު އިދިކޮޅު ކޯލިޝަނުން ވަރަށް ބޮޑަށް ކުރަމުންދާ ދުވަސްވަރެއްގައެވެ. ރާއްޖޭގައި ހަރަކާތްތެރިވަމުންދާ އިންޑިޔާގެ ސިފައިންގެ އަދަދާއި ދެ ގައުމުގެ މެދުގައި ގާއިމްކޮށްފައިވާ އެއްބަސްވުންތައް އާންމުކުރުމަށް ކެނޑިނޭޅި އަންނަނީ ގޮވާލަމުންނެވެ. އަދި އިންޑިޔާ ސިފައިން މިގައުމުން ބޭލުމަށް ގޮވާލައި ހޭޝްޓެގް އިންޑިޔާ އައުޓްގެ ނަމުގައި ސޯޝަލް މީޑިޔާގައި އަންނަނީ ކެމްޕެއިނެއްވެސް ކުރިއަށް ގެންދަމުންނެވެ.