ސަރަހައްދީ އެއާޕޯޓުތައް ހިންގަން ރައީސް އިބްރާހިމް މުހައްމަދު ސޯލިހު އުފެއްދެވި ކުންފިނީގެ ސަބަބުން އެއާޕޯޓުތަކަށް ވިޔަފާރީގެ ދިރުން ގެނެސްދޭނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
“ރީޖަނަލް އެއަރޕޯޓްސް ކޮމްޕެނީ ލިމިޓެޑް” ގެ ނަމުގައި ސަރުކާރުގެ ކުންފުންޏެއް ރައީސް ސޯލިހު އިއްޔެ ވަނީ އުފައްދަވާފައެވެ.
ރައީސް އޮފީހުން ބުނީ އެ ކުންފުންޏަކީ ސަރުކާރުން ހިންގާ ސަރަހައްދީ އެއާޕޯޓުތައް ވިޔަފާރީގެ އުސޫލުން ހިންގައި ސަރުކާރުން ރީޖަނަލް އެއާޕޯޓްސް މެދުވެރިކޮށް ހިންގާ ވައިގެ ބަނދަރުތައް ދެމެހެއްޓެނިވި ގޮތެއްގައި ތަރައްގީކޮށް ހިންގުމަށް އުފެއްދެވި ކުންފުންޏެއް ކަމަށެވެ.
މިކަމާ ގުޅިގެން މައުސޫމް ކުރެއްވި ޓްވީޓެއްގައި ވިދާޅުވީ އެ ކުންފުންޏާއެކު އައްޑޫ ސިޓީގެ ގަން އެއާޕޯޓާއި އެހެނިހެން އެއާޕޯޓުތަކަށް ވެސް ވިޔަފާރީގެ ދިރުން ގެނެސްދޭނެ ކަމަށެވެ.
މައުސޫމް ވަނީ ރައީސް ސޯލިހުގެ މި ނިންމެވުމަށް ތައުރީފުކުރައްވާފައެވެ.
"Regional Airports Company Limited" will bring business sense to Gan International Airport and other airports of #Maldives. Another superb move by HEP Ibrahim Mohamed Solih @ibusolih @AdduCityCouncil @AdcAdduCity @addulive https://t.co/EljEgErS5S
— Abdulla Mausoom (@Mausoom_Maus) September 30, 2020
ރީޖަނަލް އެއާޕޯޓުތައް މެނޭޖު ކުރުމަށް ކުންފުންޏެއް އުފެއްދެވީ ރީޖަނަލް އެއާޕޯޓްސް މެދުވެރިކޮށް ހިންގާ އެއާޕޯޓުތައް ހިންގަމުން ގެންދާ އެއާޕޯޓުތައް ދެމެހެއްޓެނިވި ގޮތެއްގައި ތަރައްގީކޮށް ހިންގަން ޖެހޭކަމަށް ދެކިވަޑައިގަންނަވާތީ ކަމަށް އެ ކުންފުނި އުފައްދަވާ ނެރުއްވި ގަރާރުގައި ވިދާޅުވެފައިވެ އެވެ.
ރާއްޖޭގެ އެކި ސަރަހައްދުތަކުގައި ރީޖަނަލް އެއާޕޯޓުތައް ތަރައްގީކޮށް ވައިގެ ދަތުރުފަތުރުގެ ދާއިރާ ތަރައްގީ ކުރަމުންދާއިރު ވެލަނާ އިންޓަނެޝަނަލް އެއާޕޯޓާއެކު ރާއްޖޭގައި 16 އެއާޕޯޓު މިހާރު އެބައޮތެވެ. އޭގެ ތެރެއިން ބައެއް އެއާޕޯޓުތަކަކީ އަމިއްލަ ކުންފުނިތަކުން ހިންގާ އެއާޕޯޓުތަކެވެ.