އެމެރިކާގެ ރައީސް ޑޮނަލްޑް ޓްރަމްޕް ކޮވިޑަށް ޕޮޒިޓިވް ވުމުން، ރައީސް އިބްރާހިމް މުހައްމަދު ސޯލިހު އަވަސް ޝިފާ އަކަށް އެދިވަޑައިގެންފިއެވެ.
ޓްރަމްޕާއި އަނބިކަނބަލުން މްލޭނިއާ ޓްރަމްޕް، ކޮވިޑަށް ޕޮޒިޓިވްވިކަން އާންމު ކުރެއްވީ، ޓްރަމްޕް މިއަދު ކުރެއްވި ޓްވީޓެއްގައެވެ.
އެކަމާ ގުޅިގެން ރައީސް ސޯލިހު ކުރެއްވި ޓްވީޓެއްގައި ވަނީ އެމަނިކުފާނާއި އަދި އަނބިކަނބަލުން ފަޒްނާ އަހުމަދުގެ ނަންފުޅުގައި ޓްރަމްޕްގެ ދެކަނބަލުންނަށް އަވަސް ޝިފާއަކަށް އެދިލައްވާފައެވެ.
Fazna and I send our well wishes to President @realDonaldTrump and @FLOTUS and wish them both a speedy recovery from COVID-19.
— Ibrahim Mohamed Solih (@ibusolih) October 2, 2020
ޓްރަމްޕާއި އަނބިކަނބަލުން ކޮވިޑަށް ޕޮޒިޓިވްވެފައި މިވަނީ، ޓްރަމްޕާއިއެކު މިދިޔަ އަންގާރަ ދުވަހު ރިޔާސީ ބަހުސަށް ވަޑައިގެންނެވި އެންމެ އިސް މުޝީރު ހޯޕް ހައިކްސްވެސް ކޮވިޑް-19އަށް ޕޮޒިޓިވްވެފައިވާކަން ވައިޓްހައުސްއިން ކަށަވަރު ކޮށްދީފައި ވާ ދަނޑިވަޅެއްގައެވެ.
ޓްރަމްޕްގެ ވިދާޅުވީ މިހާރު އޭނާއާއި އަނބިކަނބަލުން ތިއްބެވީ ކަރަންޓީނުގައި ކަމަށެވެ. ކަރަންޓީނު ފުރިހަމަ ކުރައްވާނީ ވައިޓްހައުސްގައި ކަމަށް ޚަބަރު ލިބެއެވެ.
ޓްރަމްޕްގެ ފިޒީޝަން ޑރ. ޝޯން ކޮންލޭ އާންމު ކުރެއްވި މެމޯއެއްގައި ވިދާޅުވީ، ޓްރަމްޕްގެ ދެކަނބަލުންގެ ހާލުކޮޅުވެސް ރަނގަޅު ކަމަށާ، މެޑިކަލް ޓީމުން ވަރަށް ގާތުން ކަންކަން ބަލަމުން ގެންދާނެ ކަމަށެވެ.