ކޮމިއުނިކޭޝަން މިނިސްޓަރު މުޙައްމަދު މަލީހު ޖަމާލު އިސްތިއުފާ ދެއްވުމަށްފަހު ގެއަށް ވަޑައިގަތުމަށް މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ގޮވާލެއްވުމުން، މިނިސްޓަރު މަލީހު ރޭ ހޫނު ރައްދެއް ދެއްވައިފި އެވެ.
ރައްޔިތުންގެ މަޖިލީހުގެ ޖަލްސާގައި ވާހަކަ ދައްވަމުން ބޮންޑޭ ވިދާޅުވީ އިންޓަނެޓާއި އެނޫންވެސް މުވާސަލާތީ ކަންކަމާއި ގުޅިގެން މަޖިލީހަށް ގަރާރެއް ހުށަހެޅި އެގަރާރު މަޖިލީހުގެ ތަޅުމުން ފާސްކުރުމުންވެސް މިނިސްޓަރު މަލީހު އޭގެން އެއްވެސް ކަމަކަށް އަމަލުކުރައްވާފައިނުވާ ކަމަށެވެ.
“މި މަޖިލީހުގެ މެންބަރުން ފާސްކޮށްގެން ކޮމިއުނިކޭޝަން މިނިސްޓަރަށް މިވަނީ އަންގާފަ، ވަކި މައުލޫމާތު ތަކެއް ހިއްސާކުރަން، އެވަރުކަމެއްވެސް އެޔޮތީ ނުކޮށް، މިދައްކަނީ އިންޓަނެޓާއި އެނޫންވެސް މިކަމުގެ ވާހަކަ، ދެން ނުވަންޏާ އިސްތިއުފާ ދެއްވުންވެސް މާރަނގަޅު” ބޮންޑޭ ވިދާޅުވިއެވެ.
އޭނާ އަށް ރައްދު ދެއްވައި މަލީހު ކުރެއްވި ޓުވީޓެއްގައި ވިދާޅުވީ، ސަރުކާރުން އެކުލަވައިލި ސްޓެޓެޖިކް އެކްޝަން ޕްލޭން (އެސްއޭޕީ) ގައި ހިމަނާފައިވާ ކަންކަން “ތުނޑުން ތުނޑަށް” ކުރިއަށްދާ ކަމަށެވެ.
“އެސްއޭޕީ ގެ ތަފްސީލް ބޮންޑާ އަށް ނޭނގުމުގެ ޒިންމާ މިނިސްޓްރީން ނަގަން ނުޖެހޭ،” މިނިސްޓަރު މަލީހު ވިދާޅުވި އެވެ.
މަލީހު ވިދާޅުވީ ރައްޔިތުންގެ މަޖިލީހުގެ އެއްވެސް ސިޓީއަކަށް ޖަވާބު ނުދީ ނޯންނާނެ ކަމަށާއި ވަކި ކަމެއް ކުރަން މަޖިލީހުން އަންގާފައި ވެސް ނެތް ކަމަށެވެ. މި ހާލަތަށް ކަންތައް ގޮސް، ވާނުވާ ނޭނގޭ ނަމަ އިސްތިއުފާ ދެއްވަން ޖެހިވަޑައިގަންނަވަނީ ބޮންޑާ ކަމަށް ވެސް މަލީހު ވިދާޅުވި އެވެ.
SAP ga Ministry aai mathikoffavaa kankan thundun thundah kuriyah ebadhey. SAP ge thafseel Bonda ah neygumuge zinmaa Ministryn nagan nujehey. Majlis sitee akah javaabu nudhee noannaane. Majlihun vaki kameh kuran angaafa nuvey. Vaanuvaa neygeynama isthiufaa dheyn jehenee Bondaa. https://t.co/tE6NGwCe9p pic.twitter.com/y0zBQ4Tll1
— Mohamed Maleeh Jamal (@maleehjamal) October 20, 2020
ރާއްޖޭގެ އެތެރޭގެ ފައިބަރ އޮޕްޓިކް ކޭބަލް މިހާރު ލެވިފައިވާ ރަށަރަށުގެ މައުލޫމާތާއި އަދި އެ ޚިދުމަތް ޤާއިމްކޮށްފައި ނުވާ ރަށްރަށާއި އެކަންނުކުރެވިފައިވާ ސަބަބުތަކުގެ ތަފްސީލު ހިއްސާކުރުމަށް ރައްޔިތުންގެ މަޖިލީހުން ފާސްކުރި ޤަރާރަކުން ކޮމިއުނިކޭޝަން މިނިސްޓްރީއަށް 10 ޖޫންގައި އަންގާފައިވާނެ ކަމަށް ބޮންޑޭ ވިދާޅުވިއެވެ.
ބޮންޑޭ ވިދާޅުވި ގޮތުގައި ޤަރާރުގައި ބުނެފައިވާ މުއްދަތް ފަހަނަ އަޅައި އިތުރަށް ދިޔައިރުވެސް މިނިސްޓަރު މަލީހު އެކަން ނުކުރެއްވުމަކީ ރައްޔިތުންގެ މަޖިލީހުގެ އިމްތިޔާޒްތަކަށް އަރައިގަތުމެވެ.
advertisment