ދިވެހިންގެ އަގީދާ ބަދަލުކުރަން ތަފާތު ދަންނަ ބޭކަލުންގެ ނަމުގައި މީހުން މަސައްކަތް ކުރަމުންދާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ ރާއްޖެ އިސްލާމްވި ދުވަހުގެ ތަހުނިޔާ ފޮނުއްވަމުން ކުރެއްވި ޓްވީޓެއްގައެވެ.
އެގޮތުން ނަޝީދު ވިދާޅުވީ އިސްލާމް ދީނުގެ މަތިވެރި ހަމަތަކަށް ރާއްޖެ ބޯލަނބަން ފެށީ ސޫފީ ދަންނަ ބޭކަލުންގެ މަޑުމައިތިރި ސުލްހަވެރި މަސައްކަތް ފުޅުން ކަމަށެވެ. ނަމަވެސް ދިވެހިންގެ އަގީދާ ބަދަލުކުރަން ތަފާތު ދަންނަ ބޭކަލުންގެ ނަމުގައި މީހުން މަސައްކަތް ކުރަމުންދާ ކަމަށެވެ.
“ދިވެހިންގެ އިސްލާމީ އަގިދާ ނުގުޑާ. ރާއްޖޭ އިސްލާމްވީ ދުވަހުގެ ތަހުނިޔާ.” ނަޝީދު ވިދާޅުވިއެވެ.
Islam dheenuge mathiveri hamathakah Raajje boalabanfeshee sufi dhannabeykalunge madumaithiri sulhaveri masakkaipulhun.Ehenas Dhivehinge aqeedha badhalkuran thafathu dhannabeykalunge namugai meehun masakkaiykurey.Dhivehinge Islamee aqeedha nuguda.Raajje Islamvee dhuvahuge thahniya
— Mohamed Nasheed (@MohamedNasheed) November 17, 2020
ރާއްޖެ އިސްލާމްވި ދުވަހުގެ ގޮތުގައި ދިވެހި ދައުލަތުން މިދުވަސް ފާހަގަކުރައްވަން އެންމެ ފުރަތަމަ ފެއްޓެވީ ހިޖުރައިން 1374 ވަނަ އަހަރެވެ. އެ އަހަރުން ފެށިގެން 1387 ގެ ނިޔަލަށް މި ދުވަސް ފާހަގަ ކުރެއްވުމަށްފަހު އޭގެ ފަހުން އެ ދުވަސް ފާހަގަކުރެއްވުން ވަނީ ހުއްޓަވާލައްވާފައެވެ. އެއަށްފަހު އަނެއްކާވެސް 1421 ވަނަ އަހަރުން ފެށިގެން ރާއްޖެ އިސްލާމްވި ދުވަސް ދަނީ ފާހަގަކުރަމުންނެވެ.
ތާރީޚުން އެނގެން އޮތް ގޮތުގައި ރާއްޖެ އިސްލާމްވީ ހިޖުރައިން 548 ވަނަ އަހަރުގެ ރަބީޢުލް އާޚިރު މަހުގެ 2 ވަނަ ދުވަހުއެވެ. އެއީ މީލާދީން 1153 ވަނަ އަހަރުގެ ޖޫން މަހުގެ ތެރޭގައެވެ.