މާމަގެ ފައްޓަރުބަޔަކީ އަގުހުރި އެއްޗެއްކަމަށާއި، ނަމަވެސް ދެޤައުމުގެ ގުޅުމަކީ އަގުކުރެވޭނެ ގުޅުމެއްނޫންކަމަށް ވިދާޅުވެ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖަންގް ލިޖޮންގް މަޖިލީހުގެ ރައީސް މުހައްމަދު ނަޝީދަށް ރައްދުދެއްވައިފިއެވެ.
ޗައިނާ ސަފީރު މިހެން ވިދާޅުވެފައިމިވަނީ މާމަގެ ފައްޓަރުބައި ވިއްކާލާފައި ވެސް ރާއްޖެ އިން ޗައިނާ އަށް އަދާކުރަންޖެހޭ ދަރަނިތައް އަދާނުކުރެވޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެފައިވާ ދަނޑިވަޅެއްގައެވެ.
ނަޝީދުގެ މިވާހަކަތަކަށް ރައްދުދެއްވާ ޗައިނާ ސަފީރު ކުރެއްވި ޓްވީޓެއްގައި ވަނީ ޖީ20 ގެ ޤައުމުތަކަށް ދަރަނި އަދާކުރުމުގައި ޗައިނާއިން ފަހިކޮށްދިން ލުއިފަސޭހަ ސިޔާސަތު ހިމެނޭ ޚަބަރާއެކު ވިދާޅުވީ، މާމަގެ ފައްޓާރުބަޔަކީ ފައިސާގެ ގޮތުން އަގުހުރި އެއްޗަކަށް ވާނެކަމަށެވެ. ނަމަވެސް ދެޤައުމެއްގެ ރަހުމަތްތެރިކަމަކީ އަގުކުރެވޭނެ އެއްޗެއް ނޫންކަމަށް ސަފީރު ވިދާޅުވިއެވެ.
I must admit Jewelry inherited from grandma is very precious, but with a price.
Yet we prefer friendship which is priceless.https://t.co/6gVOdDjeY3 pic.twitter.com/Gw7SffUhHX— Amb. Zhang Lizhong (@AmbassadorZhang) November 20, 2020
ރައީސް ނަޝީދު ވިދާޅުވާ ގޮތުގައި ރާއްޖޭގެ ދަރަނި ބޮޑުވީ ޗައިނާއިން ނަގާފައިވާ ލޯނުތަކުގެ ސަބަބުން ކަމަށާއި ޗައިނާއިން ގެންގުޅެނީ ދުނިޔޭގެ އެއްވެސް ޤައުމެއް ނުދަންނަ ބީރައްޓެހި ސިޔާސަތެއް ކަމަށެވެ. އަދި ދަރަނި ފަސްކުރުމަށް އެދުމުންވެސް އެކަމަށް ޗައިނާ އެއްބަސްވެފައި ނުވާކަމަށާއި ނަމަވެސް ކިތަންމެ ވަރަކަށް އެފައިސާ ހޯދަން އައިކަމުގައި ވީނަމަވެސް ނެތް އެއްޗެއް ނުދެވޭނެކަމަށް ރައީސް ނަޝީދު ވިދާޅުވިއެވެ.