އިއްޔެ މާލޭ ފަޅުތެރޭގައި މަރުވެފައި އޮއްވާ ފެނުނު އިނގިރޭސި މީހާ އަމިއްލައަށް މޫދަށް އެރި އުޅޭ މަންޒަރު ސީސީޓީވީ ކެމެރާ ފޫޓޭޖުން ފެންނަ ކަމަށް ފުލުހުން މިއަދު ބުނެފި އެވެ.
އިއްޔެ މާލޭ ފަޅުތެރޭ މޫދަށް މީހަކު ވެއްޓިފައި އޮތް ކަމުގެ މައުލޫމާތު ފުލުހުންނަށް ލިބުމުން އެމީހާ އައިޖީއެމްއެޗަށް ގެންދިޔައިރު ވެސް މަރުވެފައިވާ ކަމަށް އެމީހާ ބެލި ޑޮކްޓަރާއި ހަވާލާދީ ފުލުހުން ބުނެއެވެ.
މަރުވެފައިވަނީ އުމުރުން 58 އަހަރުގެ އިނގިރޭސިވިލާތުގެ ފިރިހެނެކެވެ.
އެ މައްސަލާގައި ފުލުހުން މިއަދު ބުނީ، އެ މީހާ އިއްޔެ ހެނދުނު 9:29 އެހާކަންހާއިރު އަމިއްލައަށް މޫދަށް އެރޭ މަންޒަރު ކެމެރާއިން ފެންނަ ކަމަށެވެ. އަދި އިރުކޮޅަކުން އޭނާގެ ހަށިގަނޑު ހަރަކާތެއް ނެތި ފެންމަތީގައި އޮންނަ މަންޒަރު ފެންނަ ކަމަށް ފުލުހުން ބުންޏެވެ.
އެހެންނަމަވެސް، އެ މީހާ އަމިއްލައަށް މޫދަށް އެރުނީ ކީއްވެ ކަމެއް އަދި އެނގިފައި ނުވެ އެވެ. ފުލުހުންވެސް އެކަމާ ގުޅޭ ހޯދުމެއް ހިއްސާކޮށްފައި ނުވެ އެވެ.