ޕޮލިސް ބޯޑެއް އުފެދިގެން ދިޔުމަކީ ފުލުހުންގެ އިދާރާ ރިފޯމް ކުރުމަށް އެޅުނު މުހިއްމު ފިޔަވަޅެއް ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ރައްޔިތުންގެ މަޖިލީހުން ރޭ ފާސްކުރި ފުލުހުންގެ ބިލުގައި ވަނީ ހަތް މެމްބަރުންގެ މައްޗަށް އެކުލެވޭ ޕޮލިސް ބޯޑު، ގާނޫނަށް އަމަލުކުރަން ފަށާތާ 14 ދުވަހުގެ ތެރޭގައި އެކުލަވާލަން ޖެހޭނެ ކަމަށް ބުނެފައެވެ.
މިކަމާ ގުޅިގެން ސީޕީ ހަމީދު މިއަދު ކުރެއްވި ޓްވީޓެއްގައި ވިދާޅުވީ ފުލުހުންގެ ރިފޯމަށް ކުރަމުންދާ މަސައްކަތުގެ ތެރެއިން މިހާތަނަށް އެޅުނު އެންމެ މުހިއްމު ފިޔަވަޅަކީ ޕޮލިސް ބޯޑެއް އުފެދުން ކަމަށާއި މިފަދަ ބޯޑެއް އުފެއްދުމަށް ފުލުހުންގެ އެގްޒެކެޓިވް މެނޭޖްމެންޓުން މިދިޔަ އަހަރުން ފެށިގެން ވެސް ވަރަށް ބޮޑަށް ބާރު އެޅި ކަމަށެވެ.
ޕޮލިސް ބޯޑާއެކު ފުލުހުންގެ ކަންކަން ގާތުން ބަލައި ފާރަވެރިވެ، ކަނޑައަޅާފައިވާ އަމާޒުތަކަށް ވާސިލުވޭތޯ ވެސް ބަލާނެ ކަމަށްވެސް ސީޕީ ހަމީދު ވިދާޅުވިއެވެ. އަދި މަޖިލީހުން ރޭ ފާސްކުރި ފުލުހުންގެ ބިލަށް މަރުހަބާ ކިޔާ ކަމަށްވެސް ސީޕީ ހަމީދު ވިދާޅުވިއެވެ.
The most progressive step taken in the journey to transform the police service and advance the policing profession so far is the creation of a new Police Board. An idea very much pushed by the Executive Management of MPS since mid 2019. It demonstrates the desire to transform.
— Mohamed Hameed (@M_Hameedh) December 7, 2020
ރޭ ފާސްކުރި ފުލުހުންގެ ބިލުގައިވާ ގޮތުން ޕޮލިސް ބޯޑް އެކުލެވިގެންވަނީ 7 މެމްބަރުންގެ މައްޗަށެވެ. އެއީ ރައީސުލްޖުމްހޫރިއްޔާ އައްޔަނުކުރާ 2 މެމްބަރުންނާއި ފަންނީ ދާއިރާއަކުން ތައުލީމާއި ތަޖުރިބާ ލިބިފައިވާ 3 މީހުންގެ އިތުރުން އާންމު ރައްޔިތުންގެ ތެރެއިން ކުރިމަތިލާ 2 މީހުންނެވެ.
advertisment