އިނގިރޭސި ވިލާތުން ކޮވިޑްގެ މުޅިން އާ ވައްތަރެއް ފެނުމާ ގުޅިގެން އެ ގައުމުން ރާއްޖެއަށް ދަތުރު ނުކުރެވޭ ގޮތް ހެދުމަށް ޕީއެންސީގެ ރައީސް އަބްދުއްރަހީމް އަބްދުﷲ ގޮވާލައިފިއެވެ.
އަދުރޭ ކުރެއްވި ޓްވީޓެއްގައި ވިދާޅުވީ ކޮވިޑުގެ މުޅިން އާ ވައްތަރެއް އިނގިރޭސިވިލާތުން ފެނި އެކަމަށް ރައްކާތެރިކަމުގެ ފިޔަވަޅު ދުނިޔޭގެ އެކި ޤައުމުތަކުން އަޅަމުންދާކަމަށެވެ. އެކި ޤައުމުތަކުން އެޤައުމަށް ދަތުރުކުރުމާއި، އެޤައުމުން އެހެން ޤައުމުތަކަށް ދަތުރުކުރުން ހުއްޓާލަމުންދާއިރު މިކަމުގައި ދިވެހި ސަރުކާރުން އަވަސް ފިޔަވަޅުތަކެއް އަޅަންޖެހޭ ކަމަށް އަދުރޭ ވިދާޅުވިއެވެ.
ކޮވިޑް-19ގެ މުޅިން އައު ވައްތަރެއް އިނގިރޭސި ވިލާތުން ފެނުމުން ދުނިޔޭގެ ވަރަށްގިނަ ގައުމުތަކުންވަނީ އެ ގައުމަށް ދަތުރުކުރުމާއި އަދި އިނގިރޭސި ވިލާތުން އެ ގައުމުތަކަށް ދަތުރުކުރުން ހުއްޓަލާފަ.ރާއްޖެއިން ވެސް މިކަމުގައި އަވަސް ފިޔަވަޅުތަކެއް އެޅުމަށް ސަރުކާރަށް ގޮވާލަން @ibusolih
— Abdul Raheem Abdulla (@Banafsaa) December 23, 2020
އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވަނީ އެގައުމުން ފެނުނު ކޮރޯނާވައިރަސް ސްޓްރެއިން، އާއްމުކޮށް ފެންނަ ސްޓްރެއިންނަށް ވުރެ ހަލުވި ކަމާއެކު ފެތުރޭ ކަމަށް ވިދާޅުވެފަ އެވެ. ނަމަވެސް އާ ސްޓްރެއިންގެ ސަބަބުން ބަލީގައި މީހުން މަރުވުމުގެ ފުރުސަތު އިތުރުވާ ކަމުގެ ނުވަތަ އޭތި ވެކްސިންއަށް ނުގުޑާނެ ކަމުގެ އެއްވެސް ހެއްކެއް ފެނިފައި ނުވާ ކަމަށް އެގައުމުގެ ޗީފް މެޑިކަލް އޮފިސާ ކްރިސް ވިޓީ ވިދާޅުވި އެވެ.
އެ ސްޓްރެއިންގެ ސަބަބުން އިނގިރޭސިވިލާތުގެ ދަތުރުތައް މަޑުޖައްސާލި 40އަށް ވުރެ ގިނަ ގައުމުތަކުގެ ތެރޭގައި އިންޑިއާ ހިމެނެ އެވެ. އަދި ސައުދީން ވަނީ ހަފްތާއެއް ވަންދެން އެގައުމުގެ ވަޔާއި ކަނޑާއި އެއްގަމުގެ ބޯޑަރުތައް ބަންދުކޮށްފަ އެވެ.
advertisment