އަދާލަތު ޕާޓީގެ ރައީސްގެ މަގާމަށް، މިހާރު ވެސް ޕާޓީގެ ރައީސްގެ މަގާމުގައި ހުންނެވި ހޯމް މިނިސްޓަރު އިމްރާން އަބްދުﷲ އާއި، އިސްލާމިކް މިނިސްޓަރު ޑރ. އަހުމަދު ޒާހިރު އަލީ ކުރިމަތިލައްވައިފި އެވެ.
އަދާލަތު ޕާޓީގެ ދުސްތޫރުގައި ފުރަތަމަ ފަހަރަށް، އަންހެނަކަށް ޕާޓީގެ ރައީސް ކަމާއި ނައިބު ރައީސް ކަމަށް ކުރިމަތިލެވޭ ގޮތަށް އިސްލާހެއް ގެނައި ނަމަވެސް އެއްވެސް އަންހެން ބޭފުޅަކު މަގާމަކަށް ކުރިމަތިލައްވާފައި ނުވެއެވެ.
އިޢުލާން: ޢަދާލަތު ޕާޓީގެ ރިޔާސީ އިންތިޚާބު 2021 އަށް ކުރިމަތިލީ ފަރާތްތައް pic.twitter.com/mdW6n37hSZ
— Adhaalath Party (@AdhaalathOffice) January 22, 2021
އަދާލަތު ޕާޓީގެ ރައީސެއްގެ ގޮތުގައި އިމްރާން ހުންނަވާތާ، ދިހަ އަހަރު ވަނީ ވެފައެވެ. މިވަގުތު ޕާޓީގެ ނައިބް ރައީސެއްގެ ގޮތުގައި ހުންނެވީ، ރައީސް އޮފީހުގެ ޗީފް އޮފް ސްޓާފް އަލީ ޒާހިރު އެވެ. ނަމަވެސް، އޭނާ އާ ދައުރަކަށް ކުރިމަތިލައްވާފައި ނުވެއެވެ.
އަހަރުތަކަށް ފަހު، އަދާލަތުން ޕާޓީގެ ރައީސާއި، ނައިބު ރައީސަކު ހޮވުމަށް ބާއްވާ އިންތިހާބު ބޭއްވުމަށް ހަމަޖެހިފައިވަނީ އަންހަ ހޮނިހިރު ދުވަހުއެވެ. އިންތިހާބުގައި ވޯޓު ލެވޭނީ، އެ ހަފްތާގެ ބުދަ ދުވަހުގެ ނިޔަލަށް ޕާޓީގެ މެމްބަރުންގެ ގޮތުގައި ބަލައިގެންފައިވާ ފަރާތްތަކަށެވެ.
އަސާސީ ގަވައިދުގެ ދަށުން ދައުރު ހަމަވީ ނަމަވެސް، އިންތިހާބަކާއި ނުލާ، މިނިސްޓަރު އިމްރާނާއި، އަލީ ޒާހިރު މަގާމުގައި ދެމިތިބި މައްސަލަ އިލެކްޝަންސް ކޮމިޝަން (އީސީ) އަށް ވެސް ދާދިފަހުން ހުށަހެޅިއެވެ.
2005 ވަނަ އަހަރުގެ ތެރޭގައި ވުޖޫދުވެގެން އައި، އަދާލަތު ޕާޓީގެ މެމްބަރުންގެ އަދަދަކީ 6،640 ކަމަށް އީސީއިން އެންމެ ފަހުން އާއްމު ކުރި ސިޔާސީ ޕާޓީތަކުގެ ހިސާބުތަކުން ދައްކައެވެ.