އިދިކޮޅު ޕީޕީއެމް ޕީއެންސީ ކޯލިޝަންގެ ފަރާތުން މާލޭގައި ކުރިއަށްގެންދާ އިހުތިޖާޖްގެ ތެރެއިން ޕީއެންސީގެ ރައީސް އަބްދުއްރަހީމް އަބްދުالله އަދި ނައިބު ރައީސް އިބްރާހިމް ޝުޖާއު ފުލުހުންގެ ބެލުމުގެ ދަށަށް ގެންގޮސްފި އެވެ.
ޕްރޮގްރެސިވް ކޮންގްރެސް ކޯލިޝަނުން މިއަދު ބޭއްވި ސީދާ ހަރަކާތަކީ ލޯކަލް ކައުންސިލް އިންތިޚާބު އަވަސްކުރުމަށާއި ރައީސް އަބްދުﷲ ޔާމިން މިނިވަން ކުރުމަށް ގޮވާލައި އަޑު އުފުލުމަށް ބޭއްވި ހަރަކާތެކެވެ. ޕީޕީއެމް އޮފީސް ކުރިމަތިން ސީދާ ހަރަކާތުގެ ބައިވެރިން މިސްރާބުޖަހާފައި ވަނީ އަމީނީމަގުން އިލެކްޝަންސް ކޮމިޝަން ހުންނަ ސަހަރައްދަށް ދިއުމަށެވެ. ނަމަވެސް ފުލުހުން ސީދާ ހަރަކާތުގެ ބައިވެރިންނަށް ހުރަސް އަޅައި ބައެއް ބައިވެރިން ފުލުހުންގެ ބެލުމުގެ ދަށަށް ގެންގޮސްފައި ވެއެވެ.
ފުލުހުން ހުރަސް އެޅުމުގެ ސަބަބުން ސީދާ ހަރަކާތުގެ ބައިވެރިންނަށް އިންތިޚާބާބެހޭ މަރުކަޒު ކުރިމައްޗަށް އެއްވެ، މަޖީދީމަގަށް އެއްވުމަށް ވަނީ މަސައްކަތްކޮށްފައެވެ. މަޖީދީމަގަށް އެއްވުމަށް ސީދާ ހަރަކާތުގެ ބައިވެރިން ކުރި މަސައްކަތް ހުއްޓުވުމަށް އޭގެތެރެއިން ބައެއް ބައިވެރިން ފުލުހުންގެ ބެލުމުގެ ދަށަށް ގެންދިޔައެވެ.
ޕްރޮގްރެސިވް ކޮންގްރެސް ކޯލިޝަންގެ ތަރުޖަމާން ވިދާޅުވީ މިއަދުގެ ހަރަކާތުގެ ތެރެއިން 24 މީހަކު ފުލުހުންގެ ބެލުމުގެދަށަށް މިހާތަނަށް ގެންގޮސްފައި ވާކަމަށެވެ.
އިހުތިޖާޖްގެ ބައިވެރިން ރައީސް ޔާމީން މިނިވަން ކުރުމަށް ގޮވާލަމުން އަންނައިރު، ރައީސް ޔާމީން ޖަލަށް ލުމަށް ކްރިމިނަލް ކޯޓުން ކުރި ހުކުމަށް ހައިކޯޓުން ތާއީދު ކޮށްފައިވާއިރު އެ ހުކުމް ބަލައި ނުގަނެ ސީދާ ހަރަކާތަށް ނިކުތުމަށް ޕީޕީއެމް ޕީއެންސީ ކޯލިޝަނުން ވަނީ ގަރާރެއް ފާސްކޮށްފަ އެވެ.
advertisment