ރޭ މާލޭގައި ހިންގި މާރާމާރީތަކުގައި އަނިޔާވި އެކަކަށް އައިސީޔޫގައި ފަރުވާދެމުންދާ ކަމަށް އައިޖީއެމްއެޗްއިން ބުނެފި އެވެ.
އައިޖީއެމްއެޗުގެ މީޑިއާ އޮފިޝަން ވިދާޅުވީ ރޭ ހިނގި މާރާމާރީތަކުގައި އަނިޔާވި ތިން މީހަކަށް އެ ހޮސްޕިޓަލުން ފަރުވާ ދެމުންދާ ކަމަށެވެ.
އޭގެ ތެރެއިން އެކަކަށް ދަނީ އައިސީޔޫގައި ފަރުވާދެމުން ކަމަށް އައިޖީއެމްއެޗުން ބުނެއެވެ.
އެކަކަށް ސާޖިކަލް ވޯޑުގައި ފަރުވާދެމުން ދާއިރު ތިންވަނަ މީހާ ވަނީ ޕްރައިވެޓް ރޫމަކަށް ބަދަލުކޮށްފައި ކަމަށް ވެސް އައިޖީއެމްއެޗުން މައުލޫމާތުދެއެވެ.
ރޭ ދެ މާރާމާރީ ހިންގާފައިވާއިރު ފުލުހުން ބުނީ ފުރަތަމަ މާރާމާރީ ހިނގީ ރޭ 19:35 ގައި ކިންގް ސަލްމާން މިސްކިތް ކައިރީ އޮންނަ ދަނޑު ކައިރީގައި ކަމަށެވެ. އަދި އޭގެ ފަހުން ރޭ 21:15 ހާއިރު އަސަރީ ހިނގުމުގައި ވަނީ މީހަކަށް ތޫނު އެއްޗަކުން ހަމަލާދީފަ ކަމަށް ފުލުހުން ބުނެއެވެ.
ފުލުހުން ބުނީ އެ ދެ މާރާމާރީއާ ގުޅޭ ތަހުގީގު މިހާރު ކުރިއަށްދާ ކަމަށެެވެ.