ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ގެ މައްޗަށް ފުލުހުން ތިން ތުހުމަތެއް ކޮށްފިއެވެ.
އަދުރޭ މިއަދު ހަވީރު ވަނީ ފުލުހުންގެ އިދާރާ އަށް ހާޒިރުކޮށްފައެވެ.
އަދުރޭ ވިދާޅުވީ ފުލުހަށް ހާޒިރުކުރީ މިދިޔަ މަހުގެ 27 ވަނަ ދުވަހު ދަރުބާރުގެ ކައިރީގައި ތިއްބައި އޭނާ ހައްޔަރަށް ގެންދިޔަ މައްސަލައިގައި ބަޔާން ނެގުމަށް ކަމަށެވެ. އެ މައްސަަލައާ ގުޅިގެން ފުލުހުން ތިން ތުހުމަތެއް ކުރައްވާ ކަމަށް އަދުރޭ ވިދާޅުވިއެވެ.
އެގޮތުން ފުލުހުން ތުހުމަތުކުރާ އެއް ކަމަކީ ފުލުހުން ބަންދުކޮށްފައި އޮތް ސަރަހައްދަކަށް ވަތްކަމުގެ ތުހުމަތު ކަމަށާއި، އަނެއް ތުހުމަތަކީ ފުލުހުންގެ ދައުރަށް ހުރަސް އެޅުން އަދި ތިންވަނަ ތުހުމަތަކީ ދަތުރުފަތުރުކުރަން އުނދަގޫވާ ގޮތަށް މަގު ބަންދުކޮށްގެން އިށީނދެ އިނދެ އަޑުގަދަ ކުރުމުގެ ތުހުމަތު ކަމަށް އަދުރޭ ވިދާޅުވިއެވެ.
އަދުރޭ ވިދާޅުވީ މިއީ ދޮގު ތުހުމަތުތަކެއް ކަމަށާއި އެގޮތުން ދަރުބާރުގޭ ޕޯޓިކޯއާ ހަމައަށް ދިޔުމުގެ ކުރިން އެއްވެސް ފުލުހަކު އެތަނަށް ވަންނަން ހުރަސް އަޅާފައި ނުވާއިރު، އެތަނަށް ދިޔައިރު އަމީނީމަގު ބަންދުކޮށްފައި ވެސް ނުވާ ކަމަށެވެ.