އިދިކޮޅު ޕީޕީއެމް/ޕީއެންސީ އިން މިއަދު މާލޭގައި ބޭއްވި އެއްވުމުގެ ތެރެއިން ފުލުހުންނާއި ކުރިމަތިލައި ހިންގި ހަމަނުޖެހުމަށް ޖަވާބުދާރީވާންޖެހޭނެ ކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެ އެވެ.
މިއަދުގެ އެއްވުމުގެ ބައިވެރިން ވަނީ ފުލުހުންނާއި ކުރިމަތިލައި، ފުލުހުންގެ ސަފުތައް ފޫ އަޅުވާލައި ބަންދުކޮށްފައިވާ ސަރަހައްދުތަކެއް ވަދެގެންފައެވެ. އެ ކުރިމަތިލުމުގެ ވީޑިއޯ ސޯޝަލް މީޑިއާގައި އާންމުވަމުންދާއިރު، އެ ކުރިމަތިލުމުގެ ތެރެއިން ފުލުހުންނާއި އާންމުންނަށް އެކިވަރުގެ އަނިޔާތައް ލިބިފައިވެއެވެ.
އެކަމާ ގުޅިގެން އީސީގެ ރައީސް ޝަރީފް ވިދާޅުވީ ސިޔާސީ ޕާޓީތަކުން ވެސް އެޗްޕީއޭ އިން އިއުލާން ކޮށްފައިވާ ރައްކާތެރިކަމުގެ ފިޔަވަޅުތަކަށް އަމަލުކުރަން ޖެހޭނެ ކަމަށެވެ.
“މި ކްލިޕް އިން ފެންނަ މަންޒަރުތަކުން މިކަން އިންތިޒާމުކުރި ޕާޓީއަކުން ޖަވާބުދާރީ ވާންޖެހޭނެ” ޝަރީފް ވިދާޅުވިއެވެ.
މިިއަދު ކުރިއަށްދިޔަ މުޒާހަރާ ކޮންޓްރޯލް ކުރުމަށް މަސައްކަތް ކުރި ފުލުހުންގެ ތެރެއިން ބައެއް ފުލުހުންނަށް އެކިވަރުގެ އަނިޔާވެ ވަނީ ހޮސްޕިޓަލަށް ގެންގޮސްފައެވެ. އަދި ބާރުގެ ބޭނުންކޮށް ފުލުހުން މުޒާހަރާ ކޮންޓްރޯކުރުމަށް ކުރި މަސައްކަތުން މުޒާހަރާގެ ބައިވެރިންގެ ތެރެއިންވެސް ބައެއް މީހުންނަށް އެކިވަރުގެ އަނިޔާތައްވެފައިވެއެވެ.