އިދިކޮޅު ޕީޕީއެމް/ޕީއެންސީގެ މަސައްކަތް ނިންމާނީ ގައުމު އަނބުރާ ދިވެހިންނަށް ހޯދައިދީފައި ކަމަަށް ޕީއެންސީގެ ރައީސް އަބްދުއްރަހީމް އަބްދުއްﷲ ވިދާޅުވެއްޖެއެވެ.
އަދުރޭ ކުރެއްވި ޓްވީޓެއްގައި ވިދާޅުވީ އިދިކޮޅުން މާލޭގެ މަގުތަކަށް އެއްވެ ކުރަމުންދާ މަސައްކަތް ނިންމާނީ ސުލްޙަވެރިކަން ގާއިމުކޮށް ޢަދުލު އިންޞާފު ކަށަވަރުކޮށްދީ، ރައީސް އަބްދުﷲ ޔާމީން މިނިވަންކޮށް އަނބުރާ ވެރިކަމަށް ގެނެސްފައި ކަމަށެވެ.
“ހައްޔަރު ކުރާނެ ވަރަކަށް ކުރަންވީ. ފަހަތަށްޖެހުމެއްނެތް. ޕީޕީއެމް/ޕީއެންސީ ދާނީ ގައުމައިގެން ކުރިއަށް.” އަދުރޭ ވިދާޅުވިއެވެ.
އިދިކޮޅު ކޯލިޝަނުން މާލޭގެ މަގުތަކުގައި ކުރިއަށް ގެންދާ މުޒާހަރާ މިރޭވެސް ކުރިއަށް ގެންދާނެކަމަށް އިދިކޮޅު ކޯލިޝަނުން ބުނެއެވެ.
މުޒާހަރާ ތެރެއިން މިހާތަނަށްވެސް ގިނަ ބަޔަކު ވަނީފުލުހުންގެ ބެލުމުގެ ދަށަށް ގެންސްގޮސްފައެވެ. އޭގެ ތެރޭގައި އިދިކޮޅު ކޯލިޝަންގެ ދެ ޕާޓީގެ ކައުންސިލް މެމްބަރުންނާއި، ކުރިއަށް އޮތް ކައުންސިލް އިންތިޚާބުގައި ކުރިމަތިލާފައިވާ އެ ކޯލިޝަންގެ ބައެއް ކެންޑިޑޭޓުންވެސް ހިމެނެއެވެ.