ފެސިލިޓީގައި އޮތް މީހާއަށް އަނިޔާކުރި މީހާ ހައްޔަރު ކޮށްފި

ހުޅުމާލެ މެޑިކަލް ފެސިލިޓީގައި (އެޗްއެމްއެފް) އޮތް ބަލި މީހަކަށް އަނިޔާކުރި ބިދޭސީ މީހާ ހައްޔަރުކޮށްފިއެވެ.

އާންމުވެފައިވާ ވީޑިއޯއިން ފެންނަނީ ހުޅުމާލެ މެޑިކަލް ފެސިލިޓީގައި އޮތް ބަލި މީހަކަށް ބިދޭސީ އެހީތެރިޔަކު އިހާނެތިކޮށް ހިތާ ހިތާ މަންޒަރެވެ. އެގޮތުން އެ ވީޑިއޯ އިން ފެންނަ ގޮތުގައި އެ ބިދޭސީ މީހާ އެ ބަލި މީހާގެ ގައިގައި ޖެހިތަން ވެސް ފެނެއެވެ.

ފުލުހުންގެ މީޑިއާ އޮފިޝަލް ވިދާޅުވީ މި މައްސަލަ ހުށަހަޅާފައިވަނީ މިއަދު ހަވީރު 4:30 ހާއިރު ހުޅުމާލެ މެޑިކަލް ފެސިލިޓީން ކަމަށާއި މި މައްސަލައާ ގުޅިގެން ބަންގްލަދޭޝްގެ 31 އަހަރުގެ ފިރިހެނަކު ހައްޔަރުކޮށްފައިވާ ކަމަށެވެ.

މި މައްސަލާގައި ރައީސް އޮފީހުގެ ތަރުޖަމާނު މަބްރޫކު އަޒީޒު ވިދާޅުވީ، އަނިޔާކުރީ ބަލިމީހާގެ ކަންކަން ބެލުމަށް އާއިލާއިން ހަމަޖެއްސި މީހެއް ކަމަށެވެ. އަދި އެމީހާ އެތަނުން ދުރުކޮށް، އާއިލާއަށް އެކަން އަންގާފައިވާކަމަށް މަބްރޫކު ވިދާޅުވިއެވެ.