ކައުންސިލްތަކަށް ސެކްރަޓަރީ ޖެނެރަލް އައްޔަނު ކުރުމުގައި ކައުންސިލްގެ ލަފާ ހޯދުމަކީ ސަރުކާރުގެ ވިސްނުން ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
މަބުރޫކު މިއަދު މިފަދައިން ވިދާޅުވި އިރު، އެސްޖީން އައްޔަނު ކުރާއިރު ކައުންސިލްތަކުގެ ލަފާ ހޯދަން ނުޖެހޭގޮތަށް ހަދަން ރައްޔިތުންގެ މަޖިލީހަށް ވަނީ އިސްލާހެއް ހުށަހަޅައިފަ އެވެ.
ގެމަނަފުށި ދާއިރާގެ މެންބަރު އަހުމަދު ސައީދު ހުށަހެޅުއްވި އިސްލާހުގައި ވަނީ ކައުންސިލްތަކުގެ ސެކްރެޓަރީ ޖެނެރަލުން އައްޔަންކުރާއިރު ކައުންސިލްގެ ލަފާ ހޯދަން ޖެހޭ ބައި އުނިކުރުމަށެވެ.
އެކަމާ ގުޅިގެން މަބްރޫކް ވިދާޅުވީ ކައުންސިލްތަކުގެ ސެކެޓްރީ ޖެނެރަލް ކަމުގެ މަގާމަށް ބޭފުޅުން އައްޔަން ކުރުމުގައި ކައުންސިލްގެ ލަފާ ހޯދުމަށް ގާނޫނުގައި މިހާރު ލިޔެވިފައިވަނީ މި ސަރުކާރުން ގެނައި މުހިއްމު އިސްލާހަކާއި އެކު ކަމަށެވެ.
“ސަރުކާރުގެ ވިސްނުމަކީ އެގޮތަށް އެކަން ކުރުން. ކައުންސިލްގެ ލަފާ ހޯދުން” މަބްރޫކް ވިދާޅުވިއެވެ.
އަދި މަޖިލީހަށް މިހާރު ހުށަހަޅާފައިވާ އިސްލާހަކީ ސަރުކާރުން ހުށަހެޅި އިސްލާހެއް ނޫން ކަމަށްވެސް މަބްރޫކް ވިދާޅުވިއެވެ.