“ލާދީނީ” ކިޔުން ހުއްޓުވާ ޕެޓިޝަންގައި ސޮއި ކުރަން ފަށައިފި

އާންމު ތަނެއްގައި ވަކި މީހަކަށް ނިސްބަތްކޮށް ކާފަރެކޭ ބުނުމާއި ކަމަށް ތުހުމަތު ކުރުމާއި އިސްލާމީ އަގީދާއާ ގުޅުވައި މުޖުތަމައުގައި މީހަކާ މެދު ނަފުރަތު އުފެއްދުމަކީ ޖިނާއީ ކުށެއް ކަމަށް ކަނޑައެޅުމަށް ޕެޓިޝަނެއްގައި ސޮއިކުރަން ފަށައިފި އެވެ.

މިއީ “ހަސަން ކުރުސީ” ނަމަކަށް ކިޔާ މީހަކު ފަށާފައިވާ ޕެޓިޝަނެކެވެ.

އެ ޕެޓިޝަނުގައި އޭނާ ބުނެފައިވަނީ އެއީ މީހުންނަށް ލާދީނީ ކިޔުމާއި އަދި ކާފަރަށް ގޮވުން ހުއްޓުވުމުގެ ބޭނުމުގައި ރައްޔިތުންގެ މަޖިލީހުގެ ރައީސަށް ހުށަހަޅާ ޕެޓިޝަނެއް ކަމަށެވެ.

އޭނާ ބުނެފައިވަނީ މީހުން ލޭބަލް ކޮށް ވާހަކަ ދެއްކުމުގެ ސަބަބުން ފާއިތުވި 10 އަހަރުގެ ތެރޭގައި ލޭ އޮހޮރުވުން ހިނގައި އެތައް ބައެއްގެ ދިރިއުޅުން ނުރައްކަލަށް ހުށަހެޅިފައިވާ ކަމަށެވެ.

އޮންލައިންކޮށް ސޮއި ހުށަހެޅޭ އެ ޕެޓިޝަންގެ ލިންކް ޚިއްސާ ކުރައްވަމުން ރައީސް މުހައްމަދު ނަޝީދު ކުރެއްވި ޓްވީޓެއްގައި ވިދާޅުވީ، އެންމެން ވެސް ނަފުރަތު އުފެއްދުމަށް ޓަކައި މީހުންގެ ބޮލުގައި އެޅުން ޖިނާއީ ކުށަކަށް ހަދަން ތާއީދުކޮށް އެ ޕެޓިޝަންގައި ސޮއިކުރަން އެދިވަޑައިގަންނަވާ ކަމަށެވެ.

https://twitter.com/mohamednasheed/status/1406165666546155526?s=21

ނަފްރަތު އުފެއްދުން ހުއްޓުވުމަށް ކަމަށް ބުނެ ގާނޫނުލްއުގޫބާތަށް އިސްލާހު ހުށަހަޅުއްވާފައިވަނީ ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު އަދި ޖޭއެސްސީގެ ރައީސް ހިސާން ހުސައިން އެވެ.

ކޮމިޓީގައި ބިލު އޮތް އިރު އެ ބިލަކީ އިސްލާމްދީނާ ދެކޮޅު ބިލެއްކަން ފާހަގަކޮށް ބައެއް އިލްމުވެރިން އަންނަނީ އެ ބިލު އަނބުރާ ގެންދިއުމަށް ސަރުކާރަށް ގޮވާލަމުންނެވެ.