މާލެ ސިޓީ ކައުންސިލްގެ ޑެޕިއުޓީ މޭޔަރުގެ މަގާމަށް މާފަންނު މެދު ދާއިރާގެ ކައުންސިލަރު އަހްމަދު ނަރީޝް ގެނައުމަށް އެއްވެސް ނުފޫޒެއް ނެތް ކަމަށް ޕީޕީއެމްއިން ބުނެފިއެވެ.
އިދިކޮޅު ކޯލިޝަނުގެ ތަރުޖަމާނު ހީނާ ވަލީދު ވިދާޅުވީ ޑެޕިއުޓީ މޭޔަރު ކަނޑައެޅުމުގެ ކަންކަން ކުރިއަށް ދިޔައީ ޕާޓީން ނެރެފައިވާ ސާކިއުލާއާ އެއްގޮތްވާ ގޮތުގެ މަތިން ކަމަށެވެ. އެގޮތުން އެކަކަށް ވުރެ ގިނަ ބޭފުޅުން ޝައުގުވެރިވުމުން އިއްޔެ ކައުންސިލު މެމްބަރުންގެ މެދުގައި އިންތިހާބެއް ބޭއްވި ކަމަށާއި މިކަމުގައި އެއްވެސް ނުފޫޒެއް ނެތް ކަމަށްވެސް ހީނާ ވިދާޅުވިއެވެ.
ޕީޕީއެމްގެ ފަރާތުން ނަރީޝް ޑެޕިއުޓީ މޭޔަރަކަށް ގެންނަން ނިންމީ އެޕާޓީގެ ކައުންސިލް މެމްބަރުންގެ މެދުގައި ނެގި ވޯޓަކުންނެވެ. މި ވޯޓުގައި 13 ކައުންސިލަރުން ބައިވެރިވެވަޑައިގެންނެވި އިރު މާލެ ސިޓީ ކައުންސިލްގައި ތިއްބަވާ ޕީޕީއެމްގެ ތިން ކައުންސިލަރެއް މި މަގާމަށް ވާދަކުރެއްވިއެވެ. އެއީ ނަރީޝްގެ އިތުރުން ހުޅުމާލެ ދާއިރާގެ ކައުންސިލަރު އިބްރާހީމް ޝުޖާއު އާއި ވިލިމާލެ ދާއިރާގެ ކައުންސިލަރު ނަހުލާ އަލީއެވެ.