ދެ ކޮޅިގަނޑެއްގެ ސަބަބުން ކުރިއަށް އޮތް ތިން ދުވަހު ރާއްޖެއަށް މޫސުން ގޯސްވާނެކަމަށް މޫސުމާއި ބެހޭ ގައުމީ އިދާރާއިން ބުނެފި އެވެ.
މޫސުމާއި ބެހޭ ގައުމީ އިދާރާއިން ބުނީ ރާއްޖެއާ ދުރުން އަރަބި ކަނޑާއި ބޭ އޮފް ބެންގަލްގައި އުފެދިފައިވާ ދެ ކޮޅިގަނޑުގެ ސަބަބުން، ކުރިއަށް އޮތް ތިން ދުވަހު ރާއްޖޭގެ ހުރިހާ ސަރަޙައްދެއްގައި އާންމުކޮށް ވައި ގަދަވެ ކަނޑުތައް ގަދަވާނެ ކަމަށެވެ. އެހެންކަމުން ހުރިހާ ފަރާތްތަކުން، ހާއްސަކޮށް ކަނޑުދަތުރުކުރާ ފަރާތްތަކުން މޫސުމަށް ސަމާލުވެ، ސަލާމަތީގޮތުން އަޅަންޖެހޭ ފިޔަވަޅުތައް އެޅުމަށް އިލްތިމާސް ކުރާ ކަމަށެވެ.
ކުރިއަށް އޮތް 3 ދުވަހު ވައި ގަދަވެ، ކަނޑުތައް ގަދަވާނެކަމަށް ބެލެވޭތީ ސަމާލުވުމަށް ދަންނަވަން.
All are advised to be cautious of strong winds and rough seas during the next 3 days.
For continuous weather updates, please follow MMS Viber group, https://t.co/jVN4MpAbFU pic.twitter.com/cIbluWj7eo
— Maldives Meteorology (@MetMaldives) November 9, 2021
ކުރިއަށް އޮތް 24 ގަޑިއިރު ރާއްޖޭގެ އެކިހިސާބަށް ގުގުރުމާއި އެކު ވާރޭ ވެހޭނެކަމަށް ވެސް މެޓުން ލަފާ ކުރެ އެވެ. އަދި ވައި ޖެހޭނީ ހުޅަނގުދެކުނާއި ހުޅަނގުން ގަޑިއަކު 13 މޭލާއި 23 މޭލާ ދެމެދުގެ ބާރު މިނުގައެވެ. ރާއްޖޭގެ ކަނޑުތަށް އާދައިގެ ވަރަކަށް ގަދާވަނެ ކަމަށާއި އަދި ލޮނުގަނޑު އުސްމިނުގައި 4-6 ފޫޓު ހުންނާނެ ކަމަށް މޫސުމާއި ބެހޭ ގައުމީ އިދާރާއިން ލަފާކުރެ އެވެ.
އަރަބި ކަނޑާއި ބޭ އޮފް ބެންގަލްގައި އުފެދިފައިވާ ދެ ކޮޅިގަނޑުގެ ސަބަބުން އިންޑިއާ އާއި ސްރީލަންކާގެ މޫސުން ވަނީ ވަރަށް ބޮޑަށް ގޯސްވެފައެވެ. އެގޮތުން ސްރީލަންކާގެ ކޮލަމްބޯ ހިމެނޭހެން އެ ގައުމުގެ 18 ސަރަހައްދަކަށް މޫސުން ވަރަށް ބޮޑަށް ގޯސްވެދާނެ ކަަމަށް ލަފާކޮށް ރެޑް އެލާޓް ނެރެފައި ވެއެވެ. މި ވިއްސާރަގައި ބައެއް ސަރަހައްދުތަކުގައި ވަރަށް ބޮޑަށް ފެންބޮޑުވެ ނުވަ މީހަކު މަރުވެފައިވެއެވެ. އަދި ދެ މީހަކު ގެއްލިގެން ރިޕޯޓްކޮށްފައި ވެއެވެ. މީގެ އިތުރުން އިންޑިއާގެ ބައެއް ސަރަހައްދުތަކަށް ވެސް މޫސުން ގޯސްވުމުގެ ސަބަބުން ބައެއް މީހުން ރައްކާތެރި ސަރަހައްދުތަކަށް ބަދަލުކުރުމުގެ މަސައްކަތް ދަނީ ކުރަމުންނެވެ.