އިދިކޮޅުން އިންތިޒާމުކޮށްގެން ބޭއްވި އިންޑިއާ އައުޓް ހަރަކާތަށް ހުރަސްއަޅައި، 28 މީހަކު ހައްޔަރު ކުރީ ވަރަށް އަނިޔާވެރި ގޮތަކަށްކަމަށް ކޮންގްރެސް ކޯލިޝަނުން ބުނެފި އެވެ.
“ސަންގު” މައުލޫމާތު ދެމުން އިދިކޮޅުގެ ތަރުޖަމާނު ހީނާ ވަލީދު ވިދާޅުވީ، އިދިކޮޅުން ކުރިއަށް ގެންދާ މުޒާހަރާގައި ފުލުހުން އަނިޔާވެރި ގޮތަކަށް 28 މީހުން ހައްޔަރު ކޮށްފައިވާ ކަމަށެވެ. އަދި ފުލުހުން ވަނީ ޕީޕީއެމް އޮފީސް ކުރިމަށްޗަށް މަޑުކޮށް އެތަށް މީހުންގެ ލޮލަށް ޕެޕަރ ސްޕްރޭ ޖަހައިފައި ކަމަށްވެސް ހީނާ ވިދާޅުވިއެވެ.
މުޒާހަރާ ތެރޭގައި އިދިކޮޅު މުޒާހަރާގައި ބައިވެރިވި އަންހެނުން ތަކުރާރުކޮށް ފުލުހުން އެމީހުންގެ ގައިގައި އަތްލައިގެން ނުވާނެކަމަށް ބުނުމުންވެސް އެތަކެއް އަނިޔާތަކެއް ކޮށްފައިވާ ކަމަށް ހީނާ ވިދާޅުވި އެވެ.
ކުރީގެ މިނިސްޓަރ އޮފް ޑިފެންސް އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ކުރެއްވި ޓްވީޓެއްގައި ވިދާޅުވީ، މިނިވަންކަމާއިއެކު ވާހަކަ ދެއްކުން ހުއްޓުވުމުގެ އެއްވެސް ހައްގެއް ފުލުހުންނަށް ނޯންނާނެ ކަމަށާއި ދިވެހި ރާއްޖޭގެ އިސްތިގްލާލާ ދޭތެރޭގައި ހުރި ކަންބޮޑުވުންތަކައް ހިޔާލު ފާޅުކުރުމުގެ ހައްގު، ދިވެހިންގެ ތެރެއިން ކޮންމެ މީހަކަށްވެސް އޮންނާނެ ކަމަށެވެ. އަދި ހައްޔަރުކޮށްފައިވާ މީހުން ވަގުތުން ދޫކޮށްލުމަށް ވެސް ވަނީ ގޮވާލެއްވި އެވެ.
It's a shame that @PoliceMv is arresting #indiamilitaryout protestors. The police has no right to curb #freespeech. Everyone of us must have the right to #express, specially over concerns on the #sovereignty of our beloved nation. I call for immediate release of those arrested. pic.twitter.com/KXKVyNvF7P
— Adam Shareef Umar (@Adamshareefz) January 7, 2022
ސޯޝަލް މީޑިއާގައި އާއްމުވެފައިވާ ޓްވީޓްތަކުން ވެސް ފެންނަނި ވަރަށް އަނިޔާވެރި ކަމާއި އެކީ އިދިކޮޅު ފަރާތްތައް ފުލުހުންގެ ވެހިކަލަށް އަރުވައިގެން ދާ މަންޒަރުކަން ހީނާ ފާހަގަކުރައްވާފައި ވެއެވެ. އަދި ވެހިކަލުގައި އިދިކޮޅުގެ އަންހެނުން ގެންދިޔައިރު 2 ފިރިހެން ފުލުހުން އެމީހުންގެ ބުރަކަށި މައްޗަށް ފައިން އަރައިގެން ތިބި ކަމަށްވެސް ހީނާ ވިދާޅުވި އެވެ.