ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖޭން ފުރުމަށް ޖާމިނުވި މައްސަލައިގައި ކޯޓުގެ އެންގުމާ ހިލާފުވެ، ކޯޓުގެ ހުރުމަތް ކަނޑެމުގެ ސަބަބުން ޖަލު ހުކުމެއް ތަންފީޒުކުރަމުންދިޔަ ކުރީގެ ޔޫތް މިނިސްޓްރީގެ ސްޓޭޓް މިނިސްޓަރު އަސްހަދު އަލީ (އަޑުބަރޭ) މިނިވަންވެއްޖެ އެވެ.
އަޑުބަރޭ މިނިވަންވެފައިވާ ކަން ކަރެކްޝަންސް ގެ ފަރާތުންވަނީ “ސަންގަށް” ކަށަވަރުކޮށްދީފައެވެ.
މައްސަލައާއި ގުޅިގެން އަޑުބަރޭ ޖަލަށްލާފައިވަނީ ފެބްރުއަރީ 19 ވަނަ ދުވަހު އޭނާ އަމިއްލައަށް ކަރެކްޝަންސް އާ ހަވާލުވުމުންނެވެ. އެ ދުވަހަށް ފަހު އަސްހަދު ދިޔައީ އޭނާގެ މައްޗަށް އިއްވި ފަނަރަ ދުވަހުގެ ޖަލު ހުކުމް ތަންފީޒު ކުރަމުންނެވެ.
އަލީ ވަހީދުގެ މައްސަލައިގައި އަސްހަދުގެ މައްޗަށް ކޯޓުގެ ހުރުމަތް ކެނޑުމުގެ ކުށް ސާބިތުވިއިރު އޭނާ ހުރީ އިނގިރޭސިވިލާތުގަ އެވެ.
އެ މައްސަލަ، އަސްހަދުގެ މައްޗަށް ސާބިތުވެ ކޯޓުން ހުކުމް އިއްވާފައިވަނީ ފެބްރުއަރީ މަހުގެ 2 ވަނަ ދުވަހުއެވެ. ހުކުމްތަންފީޒު ކުރުމަށް އެނބުރި ރާއްޖެ އައިސްފައިވަނީ ފެބްރުއަރީ މަހުގެ 19 ވަނަ ދުވަހުއެވެ.
އަސްހަދުގެ މައްޗަށް ކުށް ސާބިތުވެ ޖަލަށް ލުމަށް ހުކުމް ކުރުމާއެކު އޭނާ ވަނީ ސްޓޭޓް މިނިސްޓަރުކަމުން ވަކިކޮށްފަ އެވެ.
advertisment