ޓެރަރިޒްގެ ތުހުމަތުގައި އައްޑޫން ހައްޔަރުކުރި އެންމެން ދޫކޮށްލައިފި

އައްޑޫ ސިޓީގައި ޓެރަރިޒަމްގެ އަމަލެއް ހިންގަން އުޅުނުކަމުގެ ތުހުމަތުގައި މިދިޔަ މަހުގެ ފަހުކޮޅު ހައްޔަރުކުރި އެންމެން ދޫކޮށްލައިފިއެވެ.

އެ މައްސަލާގައި މިދިޔަ މަހުގެ 27 ވަނަ ދުވަހު އައްޑޫއިން ހައްޔަރުކުރީ 9 ފިރިހެނުންނެވެ. އެ އެންމެނަކީ ވެސް 18 އަހަރުން މަތީގެ މީހުން ކަމަށާއި، އޭގެ ތެރެއިން 6 މީހެއްގެ ބަންދަށް 7 ދުވަސް ދިނުމަށްފަހު 3 މީހަކު އޭރު ދޫކޮށްލިއެވެ. އަދި މިހާރު މިވަނީ ބާކީތިބި 6 މީހުންވެސް  ދޫކޮށްލާފައެވެ.

ފުލުހުން ބުނީ އެ މީހުން ދޫކޮށްލީ ބަންދުގައި އިތުރަށް ބައިތިއްބަން ނުފެންނާތީ ކަމަށެވެ.

އެ މީހުން ދޫކޮށްލީ އެ މުއްދަތު ވެސް ހަމަވެ، އިތުރަށް ބަންދުގައި ބައިތިއްބަން ނުފެންނާތީ ކަމަށް ފުލުހުން ބުންޏަސް މިކަމާ ގުޅޭ އިތުރު އެއްވެސް ތަފުސީލެއް ނުދެ އެވެ.