ހިޔާ ފްލެޓަކުން މަސްތުވާތަކެއްޗާއެކު ފަސް މީހަކު ހައްޔަރުކޮށްފި

މަސްތުވާތަކެތީގެ ވިޔަފާރިކުރާ ހިޔާ ފްލެޓެއް ބަލާ ފާސްކޮށް ފަސް މީހަކު ހައްޔަރު ކޮށްފިއެވެ.

މިމައްސަލައިގައި ފުލުހުން ހައްޔަރު ކޮށްފައިވަނީ 19 އަހަރާއި 26 އަހަރާއި ދެމެދުގެ ދިވެހި ފިރިހެނުންނެވެ. ހިޔާ ފްލެޓްގެ 8 ވަނަ ޓަވަރުގައި ހުރި ފްލެޓެއް، ފުލުހުން ބަލާފާސްކޮށްފައިވަނީ ކޯޓު އަމުރެއްގެ ދަށުންނެވެ.

އެ މީހުންގެ މައްޗަށް ކޮށްފައިވަނީ މަސްތުވާތަކެތި ގެންގުޅެ، ބޭނުންކޮށް، އެ ތަކެތިން ވިޔަފާރިކުރާ ކަމުގެ ތުހުމަތެވެ. ކްރިމިނަލް ކޯޓުން ވަނީ އެ ފަސް މީހުންގެ މައްޗަށް 15 ދުވަހުގެ ބަންދެއް ޖަހާފައެވެ.

ފުލުހުން ކޯޓަށް ހުށަހެޅި ހެކީގައި ބުނެފައިވަނީ އެ ފްލެޓުން 50،300ރ އާ އެކު މަސްތުވާތަކެތި ބަންދުކުރުމަށް ބޭނުންކުރާ ބައެއް އާލާތްތައްވެސް ފެނިފައިވާ ކަމަށާއި، އެ ތަނުގެ ސިޓިންރޫމްގައި ހުރި ޓީވީ ރެކުގެ ދަމާ ވަތްގަނޑުގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ބަންދުކޮށްފައިވާ ހަ ރަބަރު ޕެކެޓު ފެނިފައިވާ ކަމަށެވެ.