ޕީޕީއެމް އަށް ނިސްބަތްވާ ވިލިމާލެ ދާއިރާގެ ކައުންސިލަރު ނަހުލާ އަލީ ވިލިމާލެއަށް ނޭރުމަށް އަންގާފައިވާ ކަމަށް އޭނާ ވިދާޅުވެއްޖެ އެވެ.
ފޭސްބުކްގައި ނަހުލާ ކުރައްވާފައިވާ ޕޯސްޓެއްގައި ވިދާޅުވީ، ވިލިމާލޭ ދާއިރާގެ ކައުންސިލް މެންބަރުގެ ހައިސިއްޔަތުން މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު އާއި އެކު ދޮރުން ދޮރަށް މިއަދު ހަވީރު ހިނގަން ހަމަޖެހިފައި ވަނިކޮށް އޭނާ ވިލިމާލެއަށް އަރައިގެން ނުވާނެ ކަމަށް އަންގާފައިވާ ކަމަށެވެ. އެހެންނަމަވެސް އިންޒާރު ދިނަސް ރައްޔިތުންނަށް ޚިދުމަތް ދިނުމުގައި ފަހަތަށް ނުޖެހޭނެ ކަމަށް އޭނާ ވިދާޅުވިއެވެ.
ވިލިމާލެ އަށް ނާރަން އަންގާފައިވާ ކަމަށް ވިދާޅުވި ނަމަވެސް މި އެންގުން އެންގީ ކޮން ފަރާތަކުން ކަމެއް އޭނާ ހާމަކޮށްފައެއް ނުވެ އެވެ. ނަމަވެސް ނަހުލާ ގެންދަވަނީ ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު އަށް ތުހުމަތުތަކެއް ކުރައްވަމުންނެވެ.
ވިލިމާލޭގައި ދޮރުުން ދޮރަށް ހިނގުމަށް ހަމަޖެހިފައިވަނީ، ހުސްވެފައިވާ ވިލިމާލެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ގޮނޑި އަށް ވާދަކުރައްވާ ޕީޕީއެމްގެ ކެންޑިޑޭޓަށް ތާއީދު ހޯދުމުގެ ގޮތުންނެވެ.
advertisment