ރައީސުލް ޖުމުހޫރިއްޔާ އިބްރާހިމް މުހައްމަދު ސާލިހު، “އަމިއްލައަށް ނިގޫ ގޮށްޖެހެނީ” ކަމަށް ކުރީގެ ނައިބު ރައީސް އަދި ރައީސް ޔާމީންގެ ގާނޫނީ ވަކީލު، ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ދިވެހިރާއްޖޭގެ ގާނޫނުލްއުގޫބާތަށް އިސްލާހުތަކެއް ގެނައުމަށް ރައްޔިތުންގެ މަޖިލީހަށް ބިލެއް ހުށަހެޅުމަށް ރައީސް އޮފީހަށް ފޮނުވާފައިވާކަމަށް ބަޔާންކޮށް، އެޓާރނީ ޖެނަރަލްގެ އޮފީހުން ނެރެފައިވާ ބަޔާނަށް އިޝާރާތްކޮށް، ރައީސް ސޯލިހު ޓެގު ކުރައްވާފައިވާ ޓްވީޓެއްގައި ޖަމީލުވަނީ ގާނޫނު އަސާސީ ސަސްޕެންޑު ކުރަންވީ ނޫންތޯ ސުވާލު ކުރައްވާފައެވެ. އަދި ގާނޫނު އަސާސީގެ 27 ވަނަ މާއްދާ ސަސްޕެންޑު ކުރަންވީ ނޫންތޯ ސުވާލު ކުރައްވާ އޭނާ ވިދާޅުވީ، ރައީސް ސޯލިހު “އަމިއްލަޔަށް ނިގޫ ގޮށްޖެހެނީ” ކަމަށެވެ.
ގާނޫނު އަސާސީ ސަސްޕެންޑުކޮށްލަންވީ ނޫންތޯ؟ ނުވަތަ ގާނޫނު އަސާސީގެ 27 ވަނަ މާއްދާ ބާޠިލް ކޮށްލަންވީ ނޫންތޯ @ibusolih ؟ އަމިއްލަޔަށް ނިގޫ ގޮށްޖެހޭނީ @MDPSecretariat pic.twitter.com/yno8WnjFRe
— Mohamed Jameel Ahmed (@MJameelAhmed) June 23, 2022
ގާނޫނު އަސާސީގެ 27 ވަނަ މާއްދާއަކީ، ހިޔާލު ފާލު ކުރުމުގެ މިނިވަންކަމުގެ މާއްދާއެވެ. މި މާއްދާގެ ދަށުން މިނިވަންކަމާއިއެކު ފިކުރު ކުރުމާއި، އިސްލާމްދީނުގެ އަސްލަކާއި ހިލާފު ނުވާގޮތުގެ މަތިން، އެމީހެއްގެ ބުއްދިއަށް ފެންނަ ގޮތްތަކާއި، ހިޔާލުތައް ދުލާއި، ގަލަމުން އަދި މިނޫންވެސް ގޮތްގޮތަށް ފާޅުކުރުމުގެ މިނިވަންކަން، ގާނޫނީ އިމުގެ ތެރެއިން ކޮންމެ ރައްޔިތަކަށްވެސް ލިބިދީފައިވެއެވެ.
އެޓަރނީ ޖެނެރަލްގެ އޮފީހުން ގާނޫނަށް ގެނައުމަށް ކަނޑައެޅިފައިވާ އިސްލާހު ތަކުގެ ދަށުން، އެހެން ގައުމެއްގެ ދިދައަށް، ގައުމީ ރަމްޒަކަށް ނުވަތަ ނިޝާނަކަށް ގެއްލުން ދިނުމާއި ބަދަލު ގެނައުން، އެހެން ގައުމަކަށް ނިސްބަތްވާ މުއައްސަސާއަކަށް ގެއްލުން ދިނުން ނުވަތަ ގެއްލުން ދިނުމަށް ގޮވާލުން، އެހެން ގައުމެއްގެ ރައްޔިތަކަށް ވީތީ ފުރައްސާރަކުރުމުގެ ގޮތުން، އަނިޔާ ދިނުން ނުވަތަ އަނިޔާއެއް ދިނުމަށް ގޮވާލުން އަދި އެހެން ގައުމެއްގެ ރައްޔިތަކަށް ވީތީ، ދިވެހި ރާއްޖެ ދޫކޮށް ދިއުމަށް ގޮވާލުން ހިމެނެއެވެ.
އެޓަރނީ ޖެނެރަލްގެ އޮފީހުން ގާނޫނަށް ގެނައުމަށް މަސައްކަތްކުރާ ބަދަލު ތަކުން އިދިކޮޅުން ހިންގަމުންދާ، “އިންޑިއާ އައުޓް” ހަރަކާތް އެއްކޮށް ހުއްޓުވާލެވިގެންދާނެއެވެ. އަދި އިންޑިއާ ސިފައިން ދިވެހި ރާއްޖެއިން ފައިބައިގެންދާން ގޮވާލާ ގޮވާލުންތައް ގާނޫނީ އިމުގެ ތެރެއިން ކުށަކަށް ކަނޑައެޅި މަނާ ކުރެވިގެންދާނެކަންވެސް ފާހަގަކޮށްލެވެއެވެ.