ހުޅުމާލެ ހޮސްޕިޓަލުގައި ލިފްޓު ތެރެއަށް މީހަކު ވިހެއި މައްސަލަ ބަލަން ފަށައިފި

ހުޅުމާލެ ހޮސްޕިޓަލުގައި އަންހެނަކު ވިހެއުމުގައި އެ ހޮސްޕިޓަލުން އިހުމާލުވިކަމަށް ބުނާ މައްސަލަ ބަލަން ފަށައިފިއެވެ.

ހުޅުމާލޭ ހޮސްޕިޓަލުން ނެރުނު ބަޔާނެއްގައި ބުނެފައިވަނީ އެ މައްސަލަ ހޮސްޕިޓަލުގެ ކޮލިޓީ އެޝުއަރެންސް ޑިޕާޓްމަންޓުން ބަލަމުންދާ ކަމަށެވެ. އަދި މިކަން ހިނގާދިޔަގޮތް ބެލުމަށްފަހު، ހޮސްޕިޓަލުގެ ޕޭޝަންޓް ކެއަރ ރަނގަޅުކުރުމަށް ކުރަންޖެހޭ ކަމެއް ހުރި ނަމަ އެކަންކަން ކުރުމަށް ހޮސްޕިޓަލުގެ ފަރާތުން ކުރަންޖެހޭ މަސައްކަތްތައް ކުރުމުގައި އެ ހޮސްޕިޓަލުން ފަސްނުޖެހޭނެ ކަމަށެވެ.

ހޮސްޕިޓަލުގެ ލިފްޓްގައި މާބަނޑު އަންހެނަކު ވިހެއުމާއި ގުޅިގެން ސޯޝަލް މީޑިޔާގައި ދައުރު ވަމުންދާ ހަބަރުތަކާ ގުޅޭ pic.twitter.com/utQHSPcAeY

— Hulhumalé Hospital (@HMH_mv) July 25, 2022

ހުޅުމާލެ ހޮސްޕިޓަލް ލިފްޓުތެރެއަށް އަންހެނަކު ވިހޭ މައްސަލަ ފެންމަތިވެފައި ވަނީ މިމަހުގެ 16 ވަނަ ދުވަހުއެވެ. އެ އަންހެން މީހާ ވިހޭ ކުއްޖާ އޮތީ ނިޔާވެފައެވެ. އެ އަންހެން މީހާގެ އާއިލާއިން ވަނީ ހުޅުމާލެ ހޮސްޕިޓަލާއި އެހޮސްޕިޓަލުގައި މަސައްކަތް ކުރާ ނަރުހުންގެ އިހުމާލު މިކަމުގައި އޮތް ކަމަށް ބުނެފައެވެ.

އާއިލާ އިން ބުނާ ގޮތުގައި އަށް މަހުގައި އަންހެން މީހާގެ ބަނޑަށް ދަރިފުޅު މަރުވި ކަމަށް ބެލެވެނީ ހޮސްޕިޓަލުން ދޭންޖެހޭ މައުލޫމާތު ނުދީ އަދި އީދު ޗުއްޓީއާ ދިމާކޮށް ޕަބްލިކް ހެލްތު ޔުނިޓާއި މާބަނޑު މީހުންގެ ކްލިނިކް ބަންދުވުމާއި ގުޅިގެންނެވެ.

ހުޅުމާލެ ހޮސްޕިޓަލުން ބުނީ އެ ހޮސްޕިޓަލުގެ އަމާޒަކީ ބަލިމީހުންގެ ރައްކާތެރިކަން ކަށަވަރުކޮށްދީ ހޮސްޕިޓަލުން ދެވޭ ހިދުމަތްތަކަކީ ރައްޔިތުން ބަލައިގަންނަފަދަ ހަރުދަނާ ހިދުމަތަކަށް ހެދުން ކަމުގައެވެ.