އިގްތިސާދީ ހާލަތު ދަށްވެފައި ވާތީ، ހަރަދުތައް ހަމަޖެއްސުމަށް ސަރުކާރުގެ ނިންމުމާއި އެއްގޮތަށް ޖީއެސްޓީ އާއި ޓީޖީއެސްޓީ ބޮޑު ކުުރުމަށް ރައްޔިތުންގެ މަޖިލީހަށް މިއަދު ހުށަހަޅައިފި އެވެ.
މީޑިއާތަކަށް މައުލޫމާތު ދެމުން އެޓާނީ ޖެނެރަލްގެ އޮފީހުން ބުނީ، ޓޫރިޒަމާއި ބެހޭ ގާނޫނަށާއި، މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަސް ސަރުކާރުން ގެންނަން ބޭނުންވާ އިސްލާހުތައް މަޖިލީހަށް ފޮނުވާފައިވާ ކަމަށެވެ. ސަރުކާރުގެ ނިންމުމުގައި ވަނީ 2023 ގެ ޖެނުއަރީން ފެށިގެން ޓެކްސް ބޮޑު ކުރުމަށެވެ. އަދި އޭގެ ސަބަބުން ނޫސްވެރިންގެ ބައްދަލުވުމެއް ބާއްވައި ފިނޭންސް މިނިސްޓަރު އިބްރާހިމް އަމީރު ނޫސްވެރިންނާއި ހިއްސާ ކުރެއްވި އެވެ.
ސަރުކާރުން މަޖިލީހަށް ހުށަހަޅާފައި ވަނީ ޓީޖީއެސްޓީ 12 އިންސައްތައިން 16 އަށް ބޮޑުކޮށް، ޖީއެސްޓީ 06 އިންސައްތައިން 08 އިންސައްތައަށް ބޮޑު ކުރުމަށެވެ.
މި ނިންމުމާއި ގުޅިގެން ބައިނަލްއަގުވާމީ ބައެއް މާލީ އިދާރާތްތަކުން ރިޕޯޓުތައް އާއްމުކޮށް، ޓެކްސް ބޮޑު ކުރުން ތަންފީޒު ކުރުން އެންމެ ރަނގަޅީ 2024 ގައިކަން ފާހަގަކުރި އެވެ. އަދި އަންނަ އަހަރު ޓެކްސް ބޮޑު ކުރުމުން އިންފްލޭޝަނަށް އޭގެ އަސަރު ވަރަށް ބޮޑަށް ކުރާނެކަމަށް ބުންޏެވެ. އިންޓަނޭޝަނަލް މަނިތަރީ ފަންޑު (އައިއެމްއެފް) އިން އާއްމު ކުރި ރިޕޯޓުގައި ބުނީ ރާއްޖޭގެ އިގްތިސާދީ ހާލަތަށް ކުރިޔަށް އޮތް އަހަރުގެ ތެރޭގައި ބޮޑެތި ބަދަލުތަކެއް އަންނާނެ ކަމަށެވެ. އަދި ފައިސާ ޗާޕު ކުރުމުގެ ސަބަބުން އިންފްލޭޝަނަށް އަސަރުތަކެއް ކުރުމާއި އެކު ޓެކްސް ބޮޑު ކުުރުމުން އޭގެ ނޭދެވޭ އަސަރު އިގްތިސާދުގެ ތެރެއިން ފެންނާނެކަމަށް ވަނީ ބުނެފަ އެވެ.
ރިޕޯޓުގައި ބުނީ ރާއްޖޭގެ ބާޒާރުގައި މިވަގުތު ތަކެތީގެ އަގު ވެސް ދަނީ އުފުލެމުންކަމަށާއި، ދުނިޔޭގެ ބާޒާރުގައި ތަކެތީގެ އަގުތަކަށް އަންނާނެ ބަދަލަށް ބަލައި ޓެކްސް ބޮޑު ކުުރުމަށް ނިންމުމަކީ ރަނގަޅު ވިސްނުމެއް ނޫން ކަމަށެވެ.
މާލީ އިދާރާތްތަކުގެ ލަފައާއި ހިލާފަށް ސަރުކާރުން ޓެކްސް ބޮޑު ކުރާ ސަބަބެއް ސާފެއް ނޫނެވެ. އަދި ސަރުކާރާއި އަމީރު ތަކުރާރުކޮށް ވިދާޅުވަމުން ގެންދަވަނީ ރާއްޖޭގެ އިގްތިސާދީ ހާލަތު ރަނގަޅުކަމަށާއި، ދަރިނި ދެއްކުމުގައި އެއްވެސް ދަތިތަކެެއް ދިމާ ނުވާނެ ކަމަށެވެ.
advertisment