ދިވެހިރާއްޖޭގެ ރައްޔިތުން އެދެމުންދަނީ، ކުރީގެ ރައީސް އަދި އިދިކޮޅުގެ ރިޔާސީ ކެނޑިޑޭޓު އަބްދުﷲ ޔާމީން އަބްދުލް ގައްޔޫމް ގެނެސްދެއްވާފައިވާ ތަރައްގީތައް ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ ވިދާޅުވެއްޖެއެވެ.
ރައީސް ޔާމީން، ޖަލަށް ލީ ނަމަވެސް ރިހެބިލިޓޭޝަން ޕްރޮގްރާމްގައި ބައިވެރިވާންޖެހޭނެކަމަށް ހޯމް މިނިސްޓަރު ޝައިހު އިމްރާން އަބްދުﷲ ވިދާޅުވެފައިވާކަމަށް އިޝާރާތްކުރައްވާ، މުހައްމަދު ނަޝީދުވަނީ، ރައީސް ޔާމީން ޖަލަށްލުމަށް ނިންމާފައިވަނީތޯ، އިމްރާނާއި ސުވާލުކުރައްވާފައެވެ.
މުހައްމަދު ނަޝީދު ވިދާޅުވީ، ރައީސް ޔާމީންގެ މައްޗަށް ދައުވާކޮށްފައިވާ އާރަށުގެ މައްސަލައިގައި އަދި ކޯޓުން ވަކި ގޮތެއް ނިންމާފައި ނުވާކަމަށެވެ. އަދި ކޯޓުގެ ހުކުމެއް ނެތްކަމަށްވީނަމަވެސް، ރައީސް ޔާމީން ޖަލަށްލުމަށް ނިންމީތޯ އެނާވަނީ އިމްރާނާއި ސުވާލު ކުރައްވާފައެވެ.
މިހާރު ކޯޓުން ހުކުމް ނުކުރަނީސް @ShimranAb ކުރީބައިގައިތި ނިއްމާލީ ދޯ ކޮންމެ ގޮތަކުން ނަމަވެސް @prz_ymn ޖަލައްލާ ރައްޔިތުންގެ ކުރިމަތީގައި ހިތުން އަގު ވައްޓާލާނަމޭ… އެހެން އެކަން ނުވާނެ ރައްޔިތުން މިއަދު އެދި ގޮވަނީ ރައީސް ޔާމީންގެ ތަރައްގީއަށް… pic.twitter.com/5BJyBwGjcP
— Mohamed Nasheed Abdulla ( MosTaaA ) (@MNA_MosTaaA) September 6, 2022
އެނާ ވިދާޅުވީ، ރައީސް ޔާމީން ޖަލަށްލައި، ރައްޔިތުންގެ ކުރިމަތީގައި އެމަނިކުފާނުގެ އަގުވައްޓާލުމަށް މަސައްކަތްތައް ކުރިނަމަވެސް އެކަން އެއީ ކާމިޔާބު ކުރެވެން ނެތް ކަމެއް ކަމަށެވެ.
މީގެ އިތުރުން އަމިއްލަ ހައިސިއްޔަތުން ބައިވެރިވެ މަޖިލީހުގެ ނޮޅިވަރަމް ދާއިރާގެ ގޮނޑި ކާމިޔާބު ކުރައްވާފައިވާ މެމްބަރު މުހައްމަދު ނަޝީދު އަބްދުﷲ ވަނީ އެނާ ކުރިއަށް އޮތް ރިޔާސީ އިންތިހާބުގައި ރައީސް ޔާމީނަށް ތާއީދު ކުރައްވާކަމަށް ދޭހަވާ މޭރުމަކުން ވާހަކަދައްކަވާފައެވެ. އެގޮތުން އެނާ ވިދާޅުވީ، ދިވެހި ރައްޔިތުން އެދެމުންދަނީ، އަދި ގޮވާލަމުންދަނީ ރައީސް ޔާމީން ގެނެސްދެއްވާފައިވާ ތަރައްގީތަކަށް ކަމަށެވެ.