ދަރަނިވެރިނުވެ ގައުމުގެ ކުރިއެރުމައްޓަކައި ގާއިމު ކުރެވިފައިވާ 5.1 ބިލިއަން ރުފިޔާގެ އެސްޑީއެފް ފަންޑުގައި ބާކީ ހުރީ 98.7 މިލިއަން ރުފިޔާކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
ކުރީގެ ރައީސް އަބްދުﷲ ޔާމީން އަބްދުލް ގައްޔޫމުގެ ވެރިކަމުގައި ގާއިމުކުރައްވާފައިވާ އެސްޑީއެފް ފަންޑުގައި ހުންނަ ފައިސާ ކޮންމެ ތިން އަހަރަކުން އިތުރުވެގެންދާނެކަމަށް ފަންޑު ގާއިމު ކުރެއްވި އިރު އިގްތިސާދީ ވަޒީރުގެ މަގާމުގައި ހުންނެވި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދުވަނީ ފާހަގަކުރައްވާފައެވެ.
“ސަންގު” އިން ވަނީ މި ކަމާއި ގުޅޭގޮތުން ފިނޭންސް މިނިސްޓްރީ އާއި ސުވާލުކޮށްފައެވެ. ފިނޭންސްއިން ބުނެފައިވާގޮތުން ފަންޑުގެ ސައިޒަށް އެއްވެސް ބަދަލެއް އައިސްފައިނުވެއެވެ. އަދި އެ ފަންޑުގެ ބެލެންސް ދަށްވެފައިވާ ސަބަބަކީ އިންވެސްޓުކުރެވިފައިވުންކަމަށް ފާހަގަކޮށް ފިނޭންސް އިން ބުނެފައިވާގޮތުން އެ ފަންޑުން އެއްވެސް ހަރަދެއް ކޮށްފައިވާނަމަ ދަށްވެގެންދާނީ ފަންޑުގެ ޖުމުލަ ސައިޒެވެ. އެހެން ނަމަވެސް އެފަދަ ހަރަދެއް ކޮށްފައިނުވާނެކަމަށް ބުނެފައިވެއެވެ.
ރައީސް ސާލިހު ވެރިކަމަށް ވަޑައިގެންނެވި އިރު މި ފަންޑުގައި 200 މިލިއަން ޑޮލަރަށްވުރެ އިތުރަށް ހުރި ނަމަވެސް މިހާރު ފަންޑުގައި ހުރީ 6.4 މިލިއަން ޑޮލަރާއި ގާތް ކުރާ އަދަދެކެވެ.
ސައީދު ވިދާޅުވެފައިވާގޮތުން، ދިވެހިރާއްޖޭގެ ވެރިކަމާއި ހަވާލުވާ ކޮންމެ މީހެއްގެ މައްޗަށްވެސް މި ފަންޑު ރައްކައުތެރިކަމާއި އެކު ބެލެހެއްޓުން ލާޒިމުވެގެންވެއެވެ. އެހެން ނަމަވެސް ރައީސް ސާލިހުވަނީ މި ފަންޑުގައި ހުރި ފައިސާ ދިވެހިރާއްޖެއަށް މާލީ މަންފާތަކެއް ހާސިލުކޮށްދެއްވުމުގެ ނަމުގައި ބޭރުގައުމެއްގައި އިންވެސްޓުކޮށްފައިކަމަށް އެމަނިކުފާނު ވިދާޅުވިއެވެ.
އެމްއެމްއޭއިންވަނީ މި ފައިސާ ނުލިބިއްޖެ ހާލަތެއްގައި ދަރަނިތައް ދެއްކުމުގެ ބޮޑެތި ގޮންޖެހުންތައް ކުރިމަތިވެގެންދާނެކަމަށް ފާހަގަކޮށްފައެވެ. އެމްއެމްއޭގެ ރިޕޯޓުގައިވަނީ ފައިދާއާއި އެކު ފައިސާ އަނބުރާ ހޯދުމުގެ ޕްލޭނެއް އެކުލަވާލުމަށް ސަރުކާރަަށް އިލްތިމާޒްކޮށްފައިއެވެ.
advertisment