ސާޖަރީތައް ކުރާއިރު ބޭނުންކުރާ ކާބަންޑައި އޮކްސައިޑް ހުސްވާތީ އައިޖީއެމް ހޮސްޕިޓަލްގެ ބައެއް ސާޖަރީތައް ހުއްޓިއްޖެއެވެ.
ކާބަންޑައިއޮކްސައިޑްގެ ސްޓޮކް މަދުވަމުންދާތީ، ރޫޓިންގ ލެފަރޮސްކޮޕް ނުވަތަ ބަނޑުގައި ލޯވަޅު އަޅައިގެން ކެމެރާ ލައްވައިގެން ކުރާ ސާޖަރީތައް މިހާރު ވަނީ ހުއްޓުމަކަށް އައިސްފައެވެ.
މިވަގުތަށް ހުރި ކާބަންޑައިއޮކްސައިޑް ބޭނުން ކުރަނީ ކުއްލި ހާލަތުގައި ހަދާ ލެޕަރޮސްކޮޕް ސާޖަރީތަކަށް އެކަނި ކަމަށް މައުލޫމާތު ލިބިފައިވެއެވެ. އެހެން ނަމަވެސް އެހެން ހުރިހާ ސާޖަރީތައް ހެދެއެވެ.
ބަނޑުގައި ލޯވަޅު އަޅައިގެން ކުރާ ސާޖަރީތަކުގެ ތެރޭގައި އެޕެންޑިކްސް އާއި ގޯލް ބްލެޑަރގެ އިތުރުން ކުދި ކުދި ޓިއުމަރުތައް ނެގުން ހިމެނެއެވެ. އެގޮތުން އެފަދަ އޮޕަރޭޝަންތައް ކުރާއިރު ކާބަންޑައިއޮކްސައިޑް ހަށިގަނޑަށް ފޮނުވަނީ ރިސްކު ކުޑަކުރުމަކަށެވެ.
އައިޖީއެމްއެޗުން ދޭ ހިދުމަތުގެ ފެންވަރު ރަނގަޅު ކުރުމަށް ގިނަ މަސައްކަތްތަކެއް ކުރަމުން ދިޔަ ނަމަވެސް ޖުމްލަ ގޮތެއްގައި ސަރުކާރުގެ ހޮސްޕިޓަލްގެ ހިދުމަތް އެންމެ އެދެވޭ ގޮތެއްގައި ލިބެމުން ނުދާ ކަމަށް އާއްމު ގިނަ ފަރާތްތަކުން ދަނީ ބުނަމުންނެވެ.