އެހެން އެއްވެސް ގަައުމެއްގެ ސިފައިން ރާއްޖޭގައި ތިބޭކަށް ނުޖެހޭނެ ކަމަށް ޕީޕީއެމްގެ ނައިބު ރައީސް އަދި ތ. ގުރައިދޫ ދާއިރާ މެމްބަރު މުޙައްމަދު ޣައްސާން މައުމޫން ވިދާޅުވެއްޖެއެވެ.
ޣައްސާން މިހެން ވިދާޅުވެފައިމިވަނީ ހަތިޔާރު އެޅި އިންޑިއާ ސިފައިން ރާއްޖޭގައި ތިބި ކަމަށް ބުނެ އެ ފަރާތްތައް ރާއްޖެއިން ބޭލުމަށް ގޮވާލައި ސޯޝަލް މީޑިއާގައި ބައެއް ފަރާތްތަކުން ކެމްޕޭނެއް ފަށާފައިވަނިކޮށެވެ.
މިކަމާ ގުޅިގެން ޣައްސާން ކުރެއްވި ޓުވީޓެއްގައި ވިދާޅުވީ އަލި ރަސްގެފާނާއި ޙުސައިން އާދަމް ޝަހީދުވެވަޑައިގަތީ އަދި އުތީމު ތިން ބަދަވީން އަދި ދޮންބަންޑާރައިން ޖިހާދުކުރެއްވީ މި ޤައުމުގެ މިނިވަންކަމާއި އިސްތިޤުލާލު ހިމާޔަތްކުރެއްވުމަށް ކަމުގައެވެ.
އިރާދަކުރެއްވިއްޔާ ދިވެހިން އަބަދުވެސް ތިބޭނީ އެގޮތުގައި. ރާއްޖޭގައި ބޭރު އެއްވެސް ޤައުމެއްގެ ސިފައިން ތިބޭކަށް ނުޖެހޭނެ.” ޣައްސާން ވިދާޅުވިއެވެ.
Ali rasgefaan aai Hussain Adam shaheed vevadaigathee, utheem thin badhavin adhi dhon bandaarain jihaadh kurevvee mi gaumuge minivankamaa isthiqlaal himaayaih kuravvan. Insha Allah Dhivehin adhuves thiby egothuga thayyaarah. BEYRU EVVES gaumegge sifain mithaa thibeykah nujeheyne. pic.twitter.com/DXCeazcr2k
— Mohamed Ghassan Maumoon (@mgmaumoon) September 4, 2020
އިދިކޮޅު ފަރާތްތަކުން އަންނަނީ މިފަހަކަށް އައިސް “ގައުމު ވިއްކާލުމާއި” ދެކޮޅަށް ކަމަށް ބުނެ މުޒާހަރާތައް ވެސް ކުރިޔަށް ގެންގޮސްފައެވެ. އެ މުޒާހަރާތައް ރާއްޖޭގެ އެކި ސަރަހައްދުތަކުގައި ކުރިޔަށް ގެންގޮސްފައިވާއިރު އެތައް ބަޔަކު ސަރުކާރާއި ދެކޮޅަށް އަޑުއުފުލުމަށް ވަނީ ނިކުމެފައެވެ.
އިންޑިއާގެ 100 އަށް ވުރެ ގިނަ ސިފައިން ރާއްޖޭގައި ތިބި ކަމަށް ބުނާއިރު، ރާއްޖޭގައި އިންޑިއާގެ މިލިޓަރީ ބޭސްއެއް އަޅަން އުޅޭ ކަމަށްވެސް އިދިކޮޅުން އަންނަނީ ތުހުމަތު ކުރަމުންނެވެ. ނަމަވެސް އެ ވާހަކަތައް ސަރުކާރުން އަންނަނީ ތަކުރާރުކޮށް ދޮގު ކުރަމުންނެވެ.
advertisment