ދުނިޔޭގެ އެކި ތަންތަނަށް ދަތުރުކުރާ ފަތުރުވެރިންނަށް ރާއްޖެއަށް ދަތުރުކޮށްގެން އެހެން ތަންތަނަށް ދަތުރު ކުރަން އިނާޔަތްތަކެއް ލިބޭ ގޮތަށް “މޯލްޑިވްސް ބޯޑާ މައިލްސް”ގެ ނަމުގައި ސްކީމެއް ރޭ ލޯންޗުކޮށްފިއެވެ.
ދުނިޔޭގެ ފަތުރުވެރިކަމުގެ ދުވަހާ ގުޅިގެން ރޭ ވާޗުއަލްކޮށް ބޭއްވި ހާއްސަ އިވެންޓެއްގައި މޯލްޑިވްސް ބޯޑާ މައިލްސް ހިދުމަތް ތައާރަފުކޮށްދެއްވީ ޓުއަރިޒަމް މިނިސްޓަރު ޑރ. އަބްދުﷲ މައުސޫމް އެވެ.
މޯލްޑިވްސް ބޯޑާ މައިލްސް މެދުވެރިކޮށް ދަތުރުކުރާ ފަރާތްތަކަށް ތަފާތު އެކި ޕްރިވިލެޖް ލިބިގެންދާނެއެވެ. އަދި ފަތުރުވެރިންނަށް އެކި ކަހަލަ ބެނެފިޓްތައް ރިސޯޓުތަކުން ލިބިގެންދާނެއެވެ. އަދި އެ ފަތުރުވެރިންނަށް އެކްސްކްލޫސިވް ހިދުމަތްތަވެސް އެފަރާތްތަކަށް ލިބިގެންދާނެ އެވެ.
ފަތުރުވެރިންނަށް މި ސްކީމް މެދުވެރިކޮށް ޕޮއިންޓް ލިބިގެންދާއިރު ޕޮއިންޓް ލިބިގެންދަނީ ބޯޑާ ހުރަސްކުރާއިރު އާއި ހާއްސަ މުނާސަބަތުގައި ކުރާ ދަތުރުތަކަށެވެ. އެ ޕޮއިންޓް ސިސްޓަމް ވަނީ ތިން ޓިއާއަކަށް ބަހާލާފަ އެވެ. އެއީ ބްރޮންޒް، ސިލްވާ އަދި ގޯލްޑް އެވެ. އެގޮތުން ބްރޮންޒް އަށް ދީފައިވާ ނަމަކީ “އައިދަ” އެވެ. ސިލްވާ އަށް “އަންތަރަ” ކިޔާއިރު ގޯލްޑް އަށް ކިޔަނީ “އަބާރަނަ” އެވެ.
ރޭގެ ހަފްލަގައި ވާހަކަ ދައްކަވަމުން މިނިސްޓަރު މައުސޫމް ވިދާޅުވީ ބޯޑާ މައިލްސް ފަދަ ޕްރޮގްރާމްތައް ބައެއް ރިސޯޓުތަކުން މީގެ ކުރިންވެސް ކުރިއަށް ގެންގޮސްފައިވާ ކަމަށެވެ. އެގޮތުން މިރޭ ތައާރަފްކުރި ހިދުމަތުގެ ސަބަބުން ވިޔަފާރިތަކުގެ ޕްރޮމޯޝަނަށް ބޮޑު އެހީއެއް ލިބިގެންދާނެ ކަމަށް މައުސޫމް ވިދާޅުވިއެވެ.
އިމިގްރޭޝަން އިން އިންތިޒާމުކޮށްގެން ތައާރަފުކުރި އެ ހިދުމަތުގެ ދަށުން ފަތުރުވެރިންނަށް އެކި ކަހަލަ ބެނެފިޓްތައް ރިސޯޓުތަކުން ލިބިގެންދާނެ އެވެ. އަދި އެ ފަތުރުވެރިންނަށް އެކްސްކްލޫސިވް ހިދުމަތްތަވެސް އެފަރާތްތަކަށް ލިބިގެންދާނެ އެވެ.