ސަރުކާރަށް ކޮރަޕްޝަން އޯކޭވެ، އެކަމާ ދެކޮޅަށް އަޑުއުފުލާ މީހުން ގޯސްވެއްޖެ ކަމަށް ކުރީގެ ނައިބް ރައީސް އަދި އިދިކޮޅު ކޯލިޝަންގެ ހާއްސަ އެޑްވައިޒަރު ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
އެގޮތުން ޖަމީލް ކުރެއްވި ޓްވީޓެއްގައި ވިދާޅުވީ މަދު ދުވަސްކޮޅެއްގެ ތެރޭގައި ދައުލަތުގެ ނިޒާމް ތަޣައްޔަރުވެއްޖެ ކަމަށާއި ސަރުކާރަށް ރައްޔިތުންނަށް ކޮށްދެވުނު ކަމެއް ނެތް ކަމަށެވެ.
“ޚިޔާނާތް ފެޝަނަކަށްވެއްޖެ. ބޮޑެތި ތުހުމަތުކުރެވޭ ފަރާތްތައް ތިބީ އަމިއްލަ އަށް ގޮތް ނިންމަން ދޫކޮށްލާފައި. ސަރުކާރަށް ކޮރަޕްޝަން އޯކޭވެ، ދެކޮޅަށް އަޑުއުފުލާ މީހުން ގޯސްވެއްޖެ.” ޖަމީލް ވިދާޅުވިއެވެ.
މަދު ދުވަސްކޮޅެއްގެ ތެރޭގައި ދައުލަތުގެ ނިޒާމް ތަޣައްޔަރުވެއްޖެ. ރައްޔިތުންނަށް ކޮށްދެވުނު ކަމެއް ނެތް. ޚިޔާނާތް ފެޝަނަކަށްވެއްޖެ. ބޮޑެތި ތުހުމަތުކުރެވޭ ފަރާތްތައް ތިބީ އަމިއްލަ އަށް ގޮތް ނިންމަން ދޫކޮށްލާފައި. ސަރުކާރަށް ކޮރަޕްޝަން އޯކޭވެ، ދެކޮޅަށް އަޑުއުފުލާ މީހުން ގޯސްވެއްޖެ. pic.twitter.com/4KKWs5WvHZ
— Mohamed Jameel Ahmed (@MJameelAhmed) September 28, 2020
ޖަމީލް މިހެން ވިދާޅުވިއިރު، ކޮރަޕްޝަނަށް ހުރި ހިރާސްތައް ކުޑަކުރަން މާލިއްޔަތު ގަވައިދަށް ގެންނަން ޖެހޭ ބަދަލުތައް ގެންނަމުންދާ ކަމަށް ފިނޭންސް މިނިސްޓަރު އިބްރާހިމް އަމީރު ދާދި ފަހުން ވަނީ ވިދާޅުވެފައެވެ.
މިނިސްޓަރު އަމީރު މިހެން ވިދާޅުވެފައިމިވަނީ ބިޑަށް ނުލައި ދައުލަތުގެ މަޝްރޫއުތައް ހަވާލު ކުރެވޭ ގޮތަށް މާލިއްޔަތު ގަވާއިދުގައި ބަޔާންކޮށްފައި އޮންނަ މާއްދާ ބާތިލް ކުރުމަށް އެންޓި ކޮރަޕްޝަން ކޮމިޝަން (އޭސީސީ) އިން ފިނޭންސް މިނިސްޓްރީގައި އެދިފައިވަނިކޮށެވެ.
މިފަހަކަށް އައިސް ގިނަ މަޝްރޫއުތަކެއް ބިޑަށް ނުލާ ދިން ކަމުގެ މައްސަލަަތައް ވަނީ ފެންމަތިވެފައެވެ. ބިޑަށް ނުލާ މަޝްރޫއުތައް ދެވިދާނެ ކަމަށް ބުނެ މާލިއްޔަތު ގަވާއިދަށް އިސްލާހު ގެނެސްފައި ވަނީ 2017ވަނަ އަހަރުއެވެ.