ގެސްޓު ހައުސް ހިންގާ ރަށް ރަށުން އެހެން ރަށަކަށް ދާ މީހުން ކަރަންޓީނު ވާންޖެހޭ ސަބަބެއް ނެތް ކަމަށް މާފަންނު މެދު ދާއިރާގެ މެމްބަރު އިބްރާހިމް ރަޝީދު(ބޮންޑޭ) ވިދާޅުވެއްޖެއެވެ.
ބޮންޑޭ މިހެން ވިދާޅުވީ ގެސްޓް ހައުސް އޮޕަރޭޓްކުރާ ރަށަކުން އެހެން ރަށަކަށް ދަތުރުކުރާނަމަ 14 ދުވަހުގެ ކަރަންޓީން ފުރިހަމަކުރަންޖެހޭ ގޮތަށް އުސޫލަށް ބަދަލު ގެނެއުމާ ގުޅިގެންނެވެ.
އެގޮތުން ބޮންޑޭ ކުރެއްވި ޓްވީޓެއްގައި ވިދާޅުވީ ރާއްޖެ އެތެރެވެވެނީ ކޮވިޑް-19 ގެ ޓެސްޓު ނެގެޓިވްވެ ބަލިނެތްކަން ކަށަވަރުވެފައިވާ ޓޫރިސްޓުންނަށް އެކަނި ކަމަށާއި އެކަހެރި ރަށު ވަލުތެރޭ ހޭޅިފަށުގައި ގެސްޓު ހައުސް ހިންގާ ރަށް ރަށުން އެހެން ރަށަކަށް ދާ މީހުން ކަރަންޓީނު ވާންޖެހޭ ސަބަބެއް ނެތް ކަމަށެވެ.
ރާއްޖެ އެތެރެވެވެނީ ކޮވިޑް-19 ގެ ޓެސްޓު ނެގެޓިވްވެ ބަލިނެތްކަން ކަށަވަރުވެފައިވާ ޓޫރިސްޓުންނަށް އެކަނި .! އެކަހެރި ރަށު ވަލުތެރޭ ހޭޅިފަށުގައި ގެސްޓު ހައުސް ހިންގާ ރަށް ރަށުން އެހެން ރަށަކަށް ދާ މީހުން ކަރަންޓީނު ވާންޖެހޭ ސަބަބެއްނެތް ! pic.twitter.com/0AmDUgVxTL
— Ibrahim Rasheed (@BondeM4) September 27, 2020
ކޮވިޑް-19އާ ގުޅޭ ގޮތުން އެޗްޕީއޭއިން ޢާއްމުކޮށްފައިވާ ދަތުރު ފަތުރުކުރުމުގައި ކަރަންޓީންކުރުމުގައި ޢަމަލުކުރަންޖެހޭ އުސޫލުގައި ވަނީ ގެސްޓްހައުސް ހުންނަ ރަށްތަކަކީ ދުނިޔޭގެ އެކި ހިސާބުތަކުން ފަތުރުވެރިން މެދުނުކެނޑި އަންނަ ރަށްރަށްކަމުން ކޮވިޑް-19 ފެތުރުމުގެ ފުރުސަތު އޮތްކަމަށެވެ.
އަދި ގެސްޓް ހައުސްތަކަށް ޒިޔާރަތްކުރާ ފަތުރުވެރިންނަކީ ރަށްރަށުގެ ޢާއްމުންނާއި ގިނައިން ދިމާވާނެ ބަޔަކަށްވާތީ ރަށްރަށުގައި ބަލި ފެތުރުމުގެ ފުރުސަތު ބޮޑުކަމަށާއި އެހެންކަމުން ގެސްޓްހައުސް ހިންގާ ރަށްރަށުގެ މީހުން އެހެން ރަށަކަށްދާނަމަ މިހާރުވެސް ޢަމަލުކުރަމުން އަންނަ އެޗްޕީއޭއިން ޢާއްމުކޮށްފައިވާ “ރަށްރަށުގައި ގޭގައި ކަރަންޓީންވުމުގައި ޢަމަލުކުރަންވީ އުސޫލު”ގައި ބަޔާންކޮށްފައިވާ ގޮތަށް ޢަމަލުކުރުމަށް އެޗްޕީއޭއިން އަންގައެވެ.
މީގެއިތުރުން ރާއްޖޭގައި އޮޕަރޭޓްކުރާ ރިސޯޓުތަކުން ރަށްރަށާއި، މާލެއިން ރިސޯޓުތަކަށް ދިޔުމަށްވެސް 14 ދުވަހުގެ ކަރަންޓީން ފުރިހަމަ ކުރަންޖެހޭގޮތަށް އުސޫލު ވަނީ އިސްލާޙުކޮށްފައެވެ. މީގެތެރޭގައި އަދި އޮޕަރޭޓްކުރަން ނުފަށާ އެހެންނަމަވެސް ރިސޯޓު ހުޅުވުމަށް މަސައްކަތްކުރަމުން އަންނަ ރިސޯޓުތަކުންވެސް މި އުސޫލަށް ޢަމަލުކުރަންޖެހޭނެކަމަށް އެޗްޕީއޭއިން ބުނެއެވެ.