ގާސިމްގެ ދިފާއުގައި ޒައިދު: މީހަކު، މީހަކާ އިނަސް، ވަރިކުރިޔަސް އެއީ ބަޔަކާ ބެހޭ ކަމެއް ނޫން!

ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމް އުމުރުން ޅަ ކުއްޖަކާ ކައިވެނި ކުރުމުން މީހަކާ އަމާޒުވަމުންދާ ފާޑުކިޔުމަށް ދީނީ އިލްމުވެރިޔާ އަލީ ޒައިދު ރައްދު ދެއްވައިފިއެވެ.

އުމުރުން 70 އަހަރުގެ ގާސިމް ކައިވެނިކުރައްވާފައި ވަނީ އުމުރުން 21 އަހަރުގެ އދ. މާމިގިއްޔަށް ނިސްބަތްވާ ޒުވާނެއް ކަމަށްވާ ރާނިއާ އަބްދުލް ހާމިދާ އެވެ. މައުލޫމާތު ލިބިފައިވާ ގޮތުގައި އޭނާ ކައިވެނިކުރައްވާފައި ވަނީ ރޭ ސަން އައިލެންޑް ރިސޯޓްގަ އެވެ. އެކަމަށް ހާއްސަ ހަފްލާއެއް ސަން އައިލެންޑް ރިސޯޓުގައި ބޭއްވި ކަމަށް ވެސް މައުލޫމާތު ލިބެ އެވެ.

މިކަމާ ގުޅިގެން ސޯސަލް މީޑިއާގައި ގިނަ ބަޔަކު އަންނަނީ ގާސިމްއަށް އެކި ގޮތްގޮތުން ފާޑުކިޔަމުންނެވެ. އެއްބަޔަކު ބުނާ ގޮތުގައި ގާސިމް އެ އަންހެން ކުއްޖާއާ ކައިވެނި ކުރީ ގްރޫމް ކޮށްގެންނެވެ. އަނެއްބަޔަކު އަންނަނީ ކާފަ އުމުރުގެ މީހަކާ ކައިވެނި ކުރި ކަމަށް ބުނެ އަންހެން ކުއްޖާއަށް މަލާމާތް ކުރަމުންނެވެ.

މި ވާހަކަތަކަށް ރައްދު ދެއްވަމުން ޒައިދު ވިދާޅުވީ މީހަކު މީހަކާ އިނަސް ނުވަތަ ވަރިކުރިޔަސް އެއީ ބަޔަކާ ބެހޭ ކަމެއް ނޫން ކަމަށާއި ކައިވެނީގައި ހިނގާ ކަންކަން ދުރުގައި ތިބޭ މީހުންނަކަށް ނޭނގޭނެ ކަމަށެވެ.

“18 އަހަރުވުމަށް ފަހު ގާނޫނީ ގޮތުން އެ ބޮޑު މީހަކަށްވީ ހިނދު އަމިއްލަ އިހްތިޔާރުގައި ކުރާ ހުއްދަ ކަމަކާ ބެހެން ޖެހޭ ސަބަބެއް ނުވިސްނުން.” ޒައިދު ވިދާޅުވިއެވެ.

Meehaku meehakaa inas, nuvatha vari kuriyas eiy bayakaa behey kameh noon! Kaiveneega hingaa kankan dhurugai thibey bayakah neyngeyne!

18 aharuvumah fahu qaanoonee gothun ves bodu meehakah veehindhu amilla ikhthiyaaru ga kuraa huhdha kamakaa behen jehey sababeh nuvisnunu!

— Ali Zaid (@alizaid1000) October 1, 2020