ގއ. ދާންދޫގައި ރޭ ހިންގި ގްރޫޕް މާރާމާރީއާ ގުޅިގެން ނުވަ މީހަކު ހައްޔަރު ކޮށްފި އެވެ.
ފުލުހުން ބުނީ، އެ މާރާމާރީއާ ގުޅިގެން ތުހުމަތު ކުރެވޭ ނުވަ މީހަކު ކޯޓު އަމުރެއްގެ ދަށުން މިއަދު ހައްޔަރު ކޮށްފައިވާ ކަމަށެވެ. އިތުރު ތަފްސީލެއް ފުލުހުން ނުދެއެވެ.
ފުލުހުން މީގެ ކުރިން ބުނެފައިވާ ގޮތުގައި މި މާރާމާރީއާގައި ތިން މީހަކަށް އަނިޔާވެފައިވާ ކަމަށާއި އޭގެތެރެއިން އެކަކު ފަރުވާ ދިނުމަށް ގއ. ވިލިނގިލީ ހޮސްޕިޓަލަށް ރޭ ގެންދިޔަ ކަމުގެ މައުލޫމާތު ލިބިފައިވާ ކަމަށް ފުލުހުން ބުނެއެވެ.
އެނގިފައިވާ ގޮތުގައި އަނިޔާވި ތިން މީހުންގެ ތެރެއިން ސީރިއަސް އަނިޔާތަކެއް ލިބުނީ 17 އަހަރުގެ ކުއްޖަކަށެވެ. އޭނާގެ ބޮލަށް ވަނީ ތޫނު އެއްޗަކުން ހަމަލާދީފައެވެ. އަދި މިއަދު ހެނދުނު އޭނާ ވަނީ އިތުރު ފަރުވާއަށް މާލެ ފޮނުވާލާފަ އެވެ.