ސިދުރަތުﷲގެ ހަށިގަނޑު މިރޭ ވަޅުލަނީ

އައިޖީއެމްއެޗާއި ދިމާލު މޫދުގައި މަރުވެފައި އޮއްވައި ފެނުނު މުޙައްމަދު ސިދުރަތުﷲ އަޙްމަދުގެ ހަށިގަނޑު މިރޭގެ އިޝާ ނަމާދަށްފަހު ވަޅުލުމަށް ނިންމައިފިއެވެ.

މިދިޔަ މަހުގެ 23ގައި މަރުވެފައިވާ ސިދުރަތުގެ ކަށު ނަމާދު މިރޭ އިޝާ ނަމާދަށްފަހު ކުރިއަށްދާނީ އާސަހަރާ މިސްކިތުގައެވެ.

ސިދުރަތުގެ ޕޯސްޓްމޯޓެމް ހެދުމަށްޓަކައި އޭނާގެ ހަށިގަނޑު ވަނީ މިދިޔަ ހޯމަ ދުވަހު އިންޑިއާއަށް ފޮނުވާލާފައެވެ. އޭނާގެ ހަށިގަނޑު ޕޯސްޓްމޯޓަމަށް ފޮނުވާލީ ޓްރެވިންޑުރަމްގައި ހުންނަ މެޑިކަލް ކޮލެޖް ހޮސްޕިޓަލަށެވެ.

ސިދުރަތުﷲ ގެ ހަށިގަނޑު ޕޯސްޓްމޯޓަމް ހެދުމަށް އިންޑިއާ އަށް ފޮނުވާލީ އޭނާގެ މަރަކީ ގުދުރަތީ މަރެއް ކަމަށް ނުބެލެވޭތީ ކަމަށް ފުލުހުން ބުނެއެވެ.

ސިދުރަތުﷲ އެންމެ ފަހުން ފެނިފައިވަނީ މި މަހުގެ 22 ވަނަ ދުވަހުގެ ހެނދުނު 09:00 އާއި 10:00 އާ ދެމެދު ރަސްފަންނު މޫދާ ދިމާއަށް ދަނިކޮށެވެ.