ލޮނުޒިޔާރަތް ޕާކަށް ވަދެ ނިކުތުމުގައި ޗެކްކުރާނެ

ލޮނުޒިޔާރަތް ޕާކަށް ވަދެ ނިކުތުމުގައި އަތް ދަބަސް ޗެކް ކުރާނެ ކަމަށް މާލެ ސިޓީ ކައުންސިލުން ބުނެފި އެވެ.

މި ޕާކަށް ވަދެ ނިކުމެ އުޅުމުގައި އަމަލު ކުރަން ޖެހޭ ގައިޑްލައިނެއް މިރޭ ސިޓީ ކައުންސިލުން ވަނީ އާންމުކޮށްފައެވެ.

ޕާކު ހުޅުވާނީ ފަތިހު 4:30 އިން ހެނދުނު 9:30 އަށެވެ. އަދި ހަވީރު 4:30 އިން 9:30 އަށެވެ.

ސިޓީ ކައުންސިލުން އާންމުކުރި ގައިޑްލައިންގައި ބުނެފައިވަނީ ޕާކުތެރޭގައި ހުރި އިމާރާތަކަށް ނުވަތަ ގަހަކަށް ނުވަތަ އެއްޗަކަށް ގެއްލުން ދީފިނަމަ ފިޔަވަޅު އަޅާނެ ކަމަށެވެ.

ތޫނު އެއްވެސް އެއްޗެއް ޕާކަށް ނުވެއްދޭނެ އެވެ. ޕްލާސްޓިކް ބޭނުން ކުރުމާއި ދުންފަތުގެ އިސްތިއުމާލު ކުރުންވެސް މަނަލެވެ.