ހޯމް މިނިސްޓަރު އިމްރާން އަބްދުﷲ ގެ އިތުބާރު ނެތް ކަމުގެ މައްސަލަ، ބަޖެޓް ބަހުސަށްފަހު އެޖެންޑާ ކުރާނެ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މި މައްސަލަ މަޖިލީހަށް ހުށަހެޅީ އިދިކޮޅު ޕީޕީއެމް/ޕީއެންސީން އިސްނަގައިގެންނެވެ. އެގޮތުން މި މައްސަލަ މަޖިލީހަށް ވެއްދީ 11 މެމްބަރުންގެ ސޮޔާއެކުއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ބަޖެޓް ބަހުސް ފެއްޓެވުމަށް ފުރުސަތު ދެއްވަމުން މަޖިލިސް ރައީސް ވިދާޅުވީ، ހޯމް މިނިސްޓަރުގެ އިތުބާރު ނެތްކަމުގެ މައްސަލައިގެ ބަހުސް ދެގަޑިއިރަށް ކުރިއަށް ގެންދިއުމަށް އާއްމު ކޮމިޓީން ނިންމާފައިވާ ކަމަަށެވެ.
އެބަހުސްގައި، ބަހުސް ފެށުމުގެކުރިން ދިފާއުގައި ވާހަކަ ދެއްކެވުމަށް މިނިސްޓަރަށް 10 މިނެޓް ދިނުމަށާއި، ބަހުސްގެ މެދުތެރެއިން 10 މިނެޓް ދިނުމަށާއި، ބަހުސް ނިމުމުން 10 މިނެޓް ދިނުމަށް ކޮމިޓީން ނިންމާފައިވާ ކަމަށްވެސް ވިދާޅުވިއެވެ.
އިމްރާންގެ އިތުބާރު ނެތްކަމުގެ މައްސަލަ މަޖިލީހަށް ވެއްދިއިރު، މިއަހަރު ޖޫން މަހު ހުޅުމާލެ ސަފާރީއެއްގައި ބިދޭސީ އަންހެނަކަށް ޖިންސީ ގޯނާކުރި މައްސަލަ އާ ގުޅިގެން އިމްރާން ދާދިފަހުން ޕްރޮގްރާމެއްގައި ދެއްކި ވާހަކަތަކަކާ ގުޅިގެން އޭނާ އަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ.